Buniagantayo dagiti para ipatli
iti demonio.
Isuda dagiti mabayadan
nga agsibrong kadagiti anges
kas iti maestra a sika, Robelyn Pitao,
ti nagsagaba.
Kuarta ken pirak ken bileg
ti pagsasao ti kinaranggas
kas met ti taridan
nga iduyokda iti puso, dalem
ken bubon ni ayat:
landok iti ubing a lasag
lasag nga awanan kalasag
iti landok a ti biag mangpugsat.
Kasano a balonem dagitoy
iti kaikariam, maestra
dagiti sagubanit ti ili?
Kasano nga awitem ti babantot
ti ili iti isasaklang a mangisalakan
a langit ti batobalani
wenno ti pitak iti nakapadsuan
wenno ti napudot a dara
nga iti agdungdung-aw
a daga naigamer itan?
Kasano nga ikanawam
dagiti mammapatay
kadagiti mail-ila a namnamatayo
a maimula iti ipupusay?
Ti aripit ti kaikarian, iti Carmen,
iti pagayusan ti danum a likido
nga iti buttabuttaw a barukong
ket ti uram ti pakpakaasim
masebseban!
Datonka ti ili:
datonnaka ti ama dagiti sanaang
ti naganak kenka a kumander
dagiti dangadang. Saan a mamingga
dagiti demonio iti panagrupsa
ti isemmo kadagiti adalan.
Ulitendanto manen a dukoten
dagiti sakripisiotayo
manipud kadagiti ima
tengnged abaga rupa
bagsolenda amin kas iti tumeng
ken ti saning-i iti panagparintumeng!
Lima nga abut iti lalaem
tapno agpakadaka kadagiti saem!
Miraek ti amam iti sipnget
ket saludsodek kadagiti gagem:
ania a rikna ti makapudno
iti panangikisap iti agmalem
iti ragsak kadagiti ubbing a tenneben?
Agarubos ti lua ti ama.
Agarubos koma ti lua ti pagilian
iti agsapa nga awanka.
A Solver Agcaoili
Hon, HI/Mar 8/09
No comments:
Post a Comment