Dumteng a kas alikuno dagitoy a rikna.
Pananglanglangit amin ket adayo dagiti ulep
Iti saritaan, ti buridek iti ungto ti linia,
Siak iti tengnga dagiti arapaan nga iti maysa
Nga aldaw ket saanton nga ikabesa dagiti ramay
Ti numero a mail-ila. Kastoykami nga immadayo.
Asideg kadakami dagiti rikna a makadunggiar,
Masugat uray laeng ti punial ti anil-il
Dagiti ubbing a pinanawan tapno kadagiti bulbuloden
Nga aldaw, kadagiti man panggedan wenno iti uluanan
Ket andingayanda datao tapno mabilangmi ti kaipapanan
Dagiti naktisal-it a panagtalapuagaw.
Sanantek laeng ti kasingin ti banang-es.
Ania ngarud ket ditay met senador wenno diputado
Tapno koma makurimes dagiti amin nga isem ken masakbayan
Tapno iti bigat dagiti panagsagrap iti parabur
Di agulser ti komedor a mangur-uray iti basbas.
Iti kadarrato a maipalapayag ti idadateng ti bagyo
Wenno tudo wenno kimat, panunoten a nalaing:
Adda kadi dagiti an-anib iti sagumaymay
Tapno masukal ti kaawan iti sibay dagiti annak
Nga iti agsasaruno a saltek ket agur-uray.
A Solver Agcaoili
No comments:
Post a Comment