Saan a madaeran dagitoy
dagiti antigo a kasaor
a patibong ti laeg a kabusor.
Adda daytoy a kapessat a kaluya
kadagiti balikas a mangil-ilala
nga iti kaano man ket
ni baliwegweg a maramannaniw
dagiti kinaulbod dina matagikua.
Isu nga agyamanak, kapessat
dagiti amin a panagungar
agyamanak kalpasan ti panangsaludsod
kadagiti asiyo, "Mag-ankayo ita?"
Mag-ankayo iti itatakdang
kalpasan ti naunday
pannakaalikuno panangpabus-oy
iti sindikato ti danum
iti pannakikamalalana
iti tuktuknadentayo ita nga alinuno?
Bumatoktayo kadi
aglangoy agtunglab
agdawat iti pammakawan
sakbay ti panaglansad
iti barangabang ti balikas?
Ta pimpiman isuna ken ayat
daytoy a kabusor nga iti aggudenggudeng
a ragsak ket agbaliwangga daytoy
iti balo-a-sibibiag a pus-ong
a sipipiglat, no dadduma agud-udong
nagal-alusan nga ayat
a tedtedda dagiti sabali a ragsak
nga iti apros ket ti agkukutel
a rabrabak ti anangsab.
Narikot ngamin ti pammateg
kadagiti silpo-ti-riro iti Honolulu
kas kadagiti amin a purok
a baliwangga met dagiti arakup
wenno dagiti appupo nga agragut
kadagiti mangiyaw-awan a marmarna
a ti panuli dagiti taengda ket ti tikaw
a kadagiti agmatuon ket masalama.
Ta kasla kamotit a balitungeg daytoy,
kalpasan ti panagani kadagiti katkatawa.
Agtarubong ti kabusor nga agkuriteg
a kadagiti kalgaw dagiti parkag nga isip
ket ti laeng laing a parparawpaw
ti maikarga iti labba wenno kuribot
a tagikukua ti barsanga a pitot.
Wenno dagiti arinunos
dagiti daan a tiempo
a ti kasaor ket mangap-apiras
iti mangamkamalala a piditpidit
nga iti kuaresma ket agkalamri,
ti maitutop iti dumrigi
a no agpagungga ket agikur-it
iti pangngarig a naamnut
para iti bukod laeng a bagi.
A Solver Agcaoili
Manoa/Okt 30, 2009
