Kas man mataltalian dagiti dila.
Agbeddalda iti pannakiinnala
dagiti agragragut nga allon
kadagiti napusaksak a lei iti daytoy
a kanito dagiti agrayo a kebbakebba.
Berde nga orkidia nga inubon-ubon
dagiti agkammayet nga ayat ken ragsak
dagiti panagdirdir-i dagiti mapnek nga idda
dagiti labutab ti baybay iti Waikiki
ti isagut ti agregget nga allon
iti narakab a patong ti kadaratan
iti gumawgawawa a barukong
ita a malem ti agur-uray a mutia.
Ayna, piman, ta agbeddalda
a kas kaniak,
agbeddal dagiti dila ket isemanda
dagiti darangidangen a darikmat
kas sungbat iti saludsod ti taaw
iti nobia a maikallaysa iti aplaya
a kapilia dagiti agalimpatok
a singinan itan a katkatawa.
Itag-ay ti nobio ti kasimpungalan
dagiti makikkiki a sardam
iti kadaratan idinto ta
litak a litak ti panagmaniobra
dagiti agapal-apal a gilap ti kodak.
Sakroyen ti umadanin
a sipnget ken lawag
ti essem dagiti agbaed a saksi
a kas kaniak.
Manglaglagip, makalagip, silalagip
dagiti di mairidep nga agpatnag.
Waikiki, Hon, HI
En. 27, 2005
No comments:
Post a Comment