(Ken Ariel Tabag kas panagyaman iti bukel ti daniw)
Impakadak kenka, reberendo,
ti panangusar kadagitoy a balikas:
daytoy balikas maipapan iti santuario
iti ruar ti alad dagiti antigo a ranggas
ken buteng
ken panaggangganas
nga agbuya iti di asiasi a kasasaad
dagiti mairurumen a ragragsak.
Iti ababa a pannao,
nasantuan daytoy a katedral:
lugar ti maug-ugasan
a pannakaibinsabinsa manen
dagiti dadaan a tulagan
dagiti mamati a kas kadatayo
dagiti agay-aayat a kas kadatayo.
Santuario iti ruar ti katedral, kunam.
Anian a bendision!
Santuario a a pagpaspasulian
dagiti pimpiman a pannakigasanggasat
kadagiti kasukat ken kari
dagiti riwriw a panagarapaap kadagiti kararag
dagiti riwriw a panagkararag kadagiti arapaap
dagiti riwriw a panaglitania kadagiti nakapudno
dagiti riwriw a kinapudno kadagiti litania
ayna, aminda, reberendo, amin dagitoy
a senial ti pangabaruaran
wenno pangabaruanan dagiti senial
kadagiti krus a mailansa iti kalman dagiti diskurso
wenno diskurso dagiti kalman
kadagiti kumbento dagiti padi a di manglanglangan
kadagiti karayo ti bagi
kadagiti bagi dagiti karayo
kadagiti darang dagiti agruprupsa a templo
kadagiti agruprupsa a templo dagiti darang
ta kadagiti miserere, reberendo,
ta kadagiti miserere nga ikanta nga yibittayo
ket ipasngayda dagiti naruay a kaasi
dagiti tawen,
dagiti panawen iti lukong ti dakulap
dagiti siglo iti muging a makaawat
kadagiti sao iti nakas-ang
a gasgasat.
Amin a katedral ken kastoy, reberendo.
Aminda. Ken naruayda ditoy man ayan itatta
wenno iti pagilian a pinanawan.
Agpapadada amin.
Naipundarda iti pammati kadagiti sabangan
wenno kadagiti kadaratan nga abalbalayen
ti salawasaw nga angin amian wenno
ti barrairong nga angin iti abagatan.
Makisalsala ti angin iti silaw, di ngamin?
daytay silaw a takawen dagiti rebulto
manipud kadagiti tawa, pagbuniagan,
pagitabunan kadagiti nasudi
a rikna, ay, wen, aminen!
Adda naatap a sala iti katedral a bato.
Adda naatap a kansion iti bato a katedral.
Adda bato a katedral iti katedral a bato.
Adu dagiti manglimlimo, reberendo.
Sabasabali ti naganda, paggaammon daytoy.
Agaliasda kas kadagiti abito
wenno kas kadagiti tinapay a nabangles
wenno kas kadagiti arak
a di makapabang-ar iti rikna
dagiti agbabawi a kinadakes.
Husto ti kunam, reberendo.
Makitak itan ti pudno kadagiti kayaw
ti pudno a sipnget
ti sipnget iti pudno a kayaw
ti pannakaisalakan kadagiti mangisalakan
ti pannakasubbot kadagiti mannubbot
iti santuario iti ruar ti katedral.
Aurelio S. Agcaoili
Torrance, CA
Enero 6, 2005
4 comments:
kas nakunak iti baba, manong, pakaidayawak no matignaykayo iti sangkabassit a kapanunotanmi.
ti simbaan ket taeng latta dagiti papadi a naglibas iti kinakurapay, kinasaem, kinadangkok, kinagulib ti lubong. ngem siguradoak, tinallikudanda met ti salemsem, imnas, liwliwa dagiti angin, danum ken bakir nga isu met ti ladawan ti langit.
dear ariel,
good points, the ones you raised. now i know that you are going to be one of our better poets with that sensitivity of the spirit. go on, pilgrim soul.
manong A
nagsakay iti isem ti lagip, hehehe!
arapaapko met idi ti agpadi...ngem, makabulan laeng iti immaculate concepcion seminary sadiay vigan, ganggannaetakon iti lubong...
adu pay ti panagserbi iti Namarsua a saan laeng a dayta bokasion...adda ti diaya kadagiti anniniwan iti ulila a dulang; ti unnat dagiti dakulap, ti batak kadagiti naitikleb, ti panagbalin a responsable nga ama wenno mannurat ket maibilang met...
kas kuna ni apo Rey Duque iti daniwna"
adda cardinal a basol
ngem adda kadi met agbasol a cardinal?
patgen a jim ken ariel:
anian a kapampanunotan! itag-ayko ti kopita para kadakayo a dua a bangbangolan a baglan ken isip.
saludannakayo ti namarsua tapno adu nga adal ti maagsepmi kadagiti gapuananyo.
Ariel A (saan a T, a!)
Post a Comment