Delirio

(Natayen ti diktador ti Chile, kuna ti damag)

1.
Kasano koma nga ited ti ili
ti pammakawan iti bangkay

nga awanan iti panggep nga agrupsa
no ti lagip ket awan patinggana a sainnek

no ti isip no ti ima no ti mata
no ti sellang no ti anges no ti uttog

no ti ima ti nakamassayag a dadaulo idi
ket daradara, sidadara, agdardara

imbagsolna ti imuko ti ganggannaet nga agila
iti barukong ti ili nga agdawdawatiti linteg

iti saona isuna a nabileg, mannakabalin
naturay kas iti estranghero a kimat a puraw

daytay tadem ni kinapalalo ti imperialista
ni rungsot ni kinagaramugam ni gulib

ti tirad nga insullatna iti pagangsan
isuna ken dagiti de-kalibre a buyot

iti ngiwngiw dagiti umili a mabisin
tapno amin ket agbalin nga umel

tapno amin ket agbalin a tarkok
tapno amin ket lumnek ti ukel-ukelda

kas kadagiti bakes a makigtot
sa maarakattot nga aglisi, agtalakiaw

agapon iti bakir dagiti bangbangir nga sem
a nakaseguro wenno di makadunggiar

kasano kasano kasano kasano
a dimo danggayan dagiti agragragsak

iti laksid kadagiti umagek
iti de-sarming a lungon

ay, ugasam man iti agua bendita
ti kabaw a padi, ti tonto nga arsobispo

isuda a naglemmeng tapno di mapadso
tapno iti altar dagiti sagrado

a sermon para kadagiti nagbuteng
ket sadiay nga agsalsal dagiti inutil

salsalanda dagiti nayaw-awan a pudno
agamirisda kadagiti mapartuat a kari

dagiti amin nga anghel ken sairo
a makikunniber iti liderato

ti diktador ni kinaang-ang
kas iti diktador a pakasaritaan?

2.
Itedtay ti pammalubos iti pimmusay,
ti basbas iti inna ibaballasiw

iti karayan ti sabali manen a biag
ngem ti danum ti danum ti danum

nga inna minulitan
ti danum kadagiti waig

wenno dissuor a tawidtayo
manipud iti lawag

ti danum a kinibor ti paltog
kanion dinamita sabidong

ti soldado ti pulis ti de-kolor a danum
nga ipuspusitsit dagiti de-kolor a trak

a pangbugiaw kadagiti makiginnasanggasat
ibabawitayo kenkuana dawatentayo kenkuana

kas ti panangigunamgunamtay iti danum
kadagiti amin a mangbautisar manen kadatayo

iti nagantayo a baro ken naisalakan
datayo a nabati tapno sanguentay

ti riper dagiti dalluyon dagiti allon
dagiti anniniwan dagiti naiyaw-awan

a danum kas kadagiti bingraw
iti ragsakda ita ragsak a napalalo

kas kadagiti egges iti panagtultulakda
kas kadagiti al-alia iti panagpupunsionda

kas kadagiti saraan iti panagpadanonda
kadagiti amin a nangimuko iti panunottayo

kadagiti saraan a nangmulit
iti dayawtayo nangpadara

kadagiti nakusnaw nga ur-urattayo
aginggana a ditayon malagip

no siasinnotayo no ania a delirio
ti katukad ti panagmalmalangatayo.

3.
Agpakadatay iti nak-ti-diablo a diktador
Rugiantay ti agatur iti imbatina a basol.


A Solver Agcaoili
Honolulu, HI
Dis 11/06