Nortada

(70 ti nagawan iti baybay ti Tsina iti asideg ti Zambales ken Pangasinan, kuna ti damag, Dis. 19, 2006)


Angin iti amianan daytoy
nortada dagiti amin a panagawan


Iti baybay a pagbirokan
iti di mabirokan kadagiti bengkag
pitupulokami ita wenno narusurok pay

umaykami nga agpaisalakan
iti asi ti danum iti dung-aw ti langit

umaykami kadagiti aglima nga aldaw
umaykami kadagiti aglima a rabii
ken awan patinggana a pannakibalubal
iti ridep, iti sirmata ti nalabon a padaya

Mapuyatan dagiti masipngetan
nga oras ti kannag ti kaltaang
mapuyatan dagiti arapaap
a dumteng ti gasat
iti daklis
iti labba nga aglaplapunosan
iti garakgak
ti asawa a nabati isuna a mangikot
iti sagrado a panggep
daytay putot dagiti rugso
ti rusing dagiti agkakanaig a rikna
iti aplaya a pagsabatan
kas iti ikamen a mangabrasa
kadagiti alimpatok
nga agbirbirok iti kaasmang

Ngem ita ket kanito ti nortada
ket danggayanmi ti makaulaw a ritmo
ti panagawan santo panagadda
tapno lumned-tumpuaw dagiti butengmi
iti mabutbuteng met a saklot
ti baybay kadagiti allon
kadagiti saplit ti naunget nga apres

Impallalladawnakami ti pulluoy
a makadudul-a, daytoy a nortada
dagiti amin a maudi a pannakatay
dagiti amin a panagmalmalanga
iti oras ti panagur-uray
iti nagawanen a grasia

Dumteng kadakami
ti rungsot ti makapabang-ar a tudo
talimudawennakami ti alipugpog
nga ipasngay ti agallawig a danum
agsisipungtuan kas iti nepnep
nga am-ammo dagiti bagimi
wenno dagiti makalamri nga utekmi

agsirko nga agbalinsuek
amin nga agbalinsuek
kas iti boksitmi nga agsaraaw
iti pannakaisalakan
iti pannnakairarem iti matris
ti nagmanto a baybay:
ditoy ngatan ti pakaitabonan
dagiti amin nga an-anek-ek
dagiti amin nga imbag iti sellang
dagiti amin a darang iti pus-ong
dagiti amin a beggang iti lukong
dagiti dakulap a baluen
ni kinapimpiman


A Solver Agcaoili
UH Manoa
Dis 19/06