Adun ti makaammo a mannaniw
iti daytoy nga ebanghelio ti panagsurat:
maysa a putok ti pistola ti balikas
isawang man wenno ikutan iti ulimek
kas nana wenno gitebgiteb wenno panaas
nga ipeksa iti kaltaang ti rabii
wenno idulin iti siled ti puso
ket iti isip, sadiay nga arikapen ti dungngo
ti agas ti panagkamang kadagiti bang-ar
manipud kadagiti umbi ken lallay
ti tao nga agay-ayat
ti tao a makaammo iti bugas dagiti bunar
nga umarak kadagiti nasam-it a dayyeng
wenno iti diro nga agubbong iti samiweng
kaipapanan amin dagitoy dagiti sennaay wenno liday
a naganan ti daniw, pauluanna kas salaysay
iti panagbirbirok iti gameng kadagiti mapartuat
a nakem, maisagut dagitoy kadagiti ubbing
isuda nga agindayon kadagiti dagidagi
ti sao a nasudi wenno kadagiti ules a maitali
iti agsumbangir a panagaklili.
Putok ti pistola ti sao
ket iti katengngaan ti konsierto
a kas kuna ti pilosopo, sadiaymo a matimud
ti aligagget ken buteng ket agsilud ti dila
iti imatang ti nadiosan a panagmalmalanga:
dimo kukua a bukbukod ti sao
aradoyo daytoy a kaduam ti puli
pangsukayyo iti bengkag dagiti utek a kimriit
dagiti man agkudaap a di met agsangit
muriskiyo daytoy a kaduam ti mannamay
pangpatagyo kadagiti bingkol ti salidummay
wenno dagiti kankansion a nalipatan
a pampakalma iti barukong
no ti kararua ket agkitakit a maipasngay.
Putok ti pistola ti sao
ti mangabalbalay ti maikulbo.
A Solver Agcaoili
UH Manoa/Dis 27/06
No comments:
Post a Comment