Dadaulo, Dadaulo

(Inyebkas iti pasken ti Dingrenos, Pacific Beach Hotel, Honolulu, Hawaii, Pebrero 26, 2006)

Sika a dadaulo ti rabii ti ukkoranmi iti daytoy a laing
Iti nasaririt nga ulom daytoy nakasamsam-it nga isem
Ta sika ta sika ti pakabuklan daytoy a panggepen
Daytoy nga arapaap, kasingin napintas a sagudayen.

Sika ngamin ti dadaulo ti riwriw a bituen ti rabii
Ti silaw ti kararuami nga umas-asug, paaklili
Ti silnag ti bulan nga iti dakulapmi agkirem
Ngem iti palad agrimat, nakataltalingenngen.

Ita a rabii a nagasat, ita nga oras ti ragragsak
Sika ti dadaulo ti naidumduma a kannag ti biag
Dakami nga adipen ti asi, buyot agnanayon nga ayat
Sika ta sika ngamin ti senial ti naimbag a karadkad.

Buyaendaka, dadaulo, miraendaka, santak ni imnas
Mingmingan a kas iti makigin-ginnantil nga arasaas
Ta iti sidongmo, dadaulo, ta iti ngayed ti korona
Iti pusom nga agtalinaed ti nalinteg a kasaba.

Ibagam ngarud, dadaulo, kadakami a paaklili
Isawangmo ta yebkas ti amin a pakaibaonanmi
Agaramidkami kadi iti pintas kas itay sudi
Agpartuatkami kadi iti sirmata a naisupsupadi?

Baliksem, dadaulo, ti linteg ti paiwanwan nga isipmi
Pagbalinem a regta ti dayaw a kenka ket ibalangatmi
Korona ti natarnaw a kararua, gapu ti pakabendisionan
Rugi met dagiti amin a rugi, punganay pakaisalakanan.

Nanamem ngarud, apomi a dadaulo, ti imnas ti balangat
Igaed nga igaed ti panangkaykaysa kadakami a sapasap
Kas iti allukoy dagiti ragragsakmi ita a mangmatmatmat
Ti takneng ti kinatao, pakabuklan ti amin a kinasayaat.

Mingminganmi ti ngayed ti panagidaulo iti rabii
Aklonenmi ita ti laing a kasingin ti panagumbi
Ta sika, dadaulo, sika ti saksi dagiti amin a saksi
Saksi ti nalabon nga ayat iti panagkurnomi.

Kenka nga itedmi ti amin a pammadayaw
Kenka a yas-asidegmi amin nga ar-araw
Ta ammomi nga iti sumuno nga aldaw
Dimonto ipaidam ti linteg a natarnaw.

Agdayawkami kenka, dakami amin a paadipem
Bigbigen ta bigbigenmi ti naisangsangayan a laing
Ta dayta a laing ti mangitunda kadakami amin
Mangisuro kadakami iti dana nga agtunda iti taklin.

Agnaimbag a rabiikami kenka kas panagdayaw
Agkurno iti saguday ti korona, simbolo ti kayaw
Dakami a sumursurot iti pakaibaonan
Dakami nga agbirbirok iti paglaingan.

Naimbag a rabiim, madaydayaw a dadaulo
Naimbag a rabiiyo, agrayokami kadakayo
Dakami nga adda iti daytoy a tallaong
Datayo amin a testigo itoy a bendision.