Vagina Monologues (Chapter 06)

INTRO—IDI DOSEK. TINUNGPANAK NI NANANGKO.

Adu dagiti babbai a nainterbiu maipapan iti panagregla. Kasla maysa a koro ti nangrugi a napasamak, kasla maysa a kita ti kigaw a kolektibo a kanta. Inyallugungan dagiti babbai ti timek ti maysa ken maysa. Nagpadara dagiti timek, nagpadarada iti tumunggal maysa.


Doseak idi. Tinungpanak ni Nanangko.

B-1
Addaak iti maikadua a tukad, pito a tawen, ti kabsatko a lalaki ket agsasao maipapan iti panagregla, period iti Ingles. Diak kayat ti panagkatkatawana. Napanak ken ni Nanangko. “Ania’t period?” kinunak. “Period? Maysa a marka iti utit ti sentence,” kinunana. “Dayta daytay tuldek nga ipanmo idiay tapno malpas tay saom.”

B-2
Inggatangannak ni Tatang iti card: “Para iti bassit a balasangko a saanen a bassit.”

B-3
Nagbutengak. Impakita kaniak ni Nanang dagiti nakabengbeng a napkin. Dagiti nausaren, ipanko kano iti lata nga adda iti babaen ti lababo.

B-4
Malagipko a siak ti kaudian. Treseak idi.

B-1
Aminkami segseggaanmi ti idadatengna.

B-3
Grabe ti butengko. Rinugiak nga inkabil dagiti nausaren a pad iti brown a paper bag sako insuksok kadagiti nakasipsipnget a lugar iti babaen dagiti atep.

B-2
Addaak idi iti maikawalo a tukad. Kinuna ni Nanang, “O, nagsayaaten.”

B-4
Addaak idi iti junio high—kasla kolor daga a nagtedted sakbay nga immay. Naggiddan a timmubo ti babassit a buok iti kilikilik, a nagtubo a di nagpapada: maysa a kilikili adda, iti sabali a kilikili, awan.

B-1
Disisaisak idi. Kasla man mabutbutengak.

B-2
Innikkannak ni Nanang idi codeine. Adda dagiti bunk bedsmi. Idiayak a nagidda. Saan a makaidna ni Nanang.

B-3
Maysa a rabii, nagbayak a simmangpet ket nagderetsoak a nagkukot iti iddak a diak sinindiak dagiti silaw. Nakita ni Nanang dagiti nausar a pad ket impanna iti nagbaetan dagiti kobrekama.

B-2
Doseak idi, nakapang-unegak pay laeng. Diak pay nakasukat. Kinitak a nagpababa ti agdan. Adda idiay.

B-1
Kinitak ti suelo ket adda idiay.

B-3
Maikapito a tukad, nalasin ni Nanang ti pang-unegko. Kalpasanna, inikkannak iti adu a lampin a plastic.

B-2
Maragragsakan ni Nanang. “Ikkandaka iti pasador.”

B-3
Ni Marcia a gayyemko, nagselebrarda iti nagregla. Nangangayda iti maysa a pangrabii para kenkuana.

B-1
Amintayo sinegseggaantay ti panagreglatayo.

B-4
Trese anios. Panawen sakbay ti Kotex. Masapul idi a bantayam ti badom. Maysaak a nangisit ken marigrigat. Adda idi dara iti likod ti badok idi addakami iti simbaan. Saan a naglasin, ngem kaslaak man la nagbasol.

B-2
Sangapulo ken guduak idi. Awan preparasion. Maysa kayumanggi a pilkat iti sapinko.

B-1
Impakitana kaniak no kasano ti mangikabil iti tampon. Diak nasursuro’t daras.

B-2
Kaniak, maysa a di maipaliwanag a pasamak daytoy panagreglak.

B-4
Kinuna ti nanangko a mangusarak kano iti pasador. Saanko a mabalin ti tampon. Dimo pay mabalin ti mangipan iti ania man iti naasukaran a sidam.

B-3
Agaruatka iti nalukotlukot a kapas. Imbagak ken ni nanangko. Inikkannak iti adu nga Elizabeth Taylor a munieka.

B-2
Kinse anios. Kinuna ni nanangko, “Mazel-tov.” Dagiti Indian, agtugtugawda iti lumot iti lima nga aldaw. Nagbalinan koma laengen a Natibo nga Amerikano.

B-3
Kinsek idin isu a mangnamnamaakon ti panagreglak. Nagtayagakon ken tumaytayagak pay.

B-4
Iti gym, no makitak idi dagiti babbai a puraw nga agus-usar iti tampon, kunak a dadakesda a babbai.

B-2
Nakakitaan kadagiti purpuritak a nalabaga iti derosas a suelo. Kinunak, “Wen.”

B-4
Naayatan ni nanang kaniak.

B-1
Nagaramatak iti OB ken nagustuak nga iserrek ti ramayko nga agpangato.

B-4
Onse, agus-usar iti puraw a pantaloon. Nangrugi a nagsayasay ti dara. Kunak no nakaam-amak.

B-1
Diak pay nakasagana.

B-2
Nasakit ti likodko.

B-4
Naguttogak.

B-3
Dose aniosak. Nagragsakak. Adda Ouija Board ti gayyemko, sinaludsodmi no kaanonto ti panagreglami, kinitak ti baba ket nakakitaak ti dara.

B-1
Kinitak ti baba ket adda idiay.

B-4
Maysaak a naan-anay a babai.

B-2
Nagbutengak

B-1
Kunak no din umay ti bisitak.

B-4
Binalbaliwanta ti panagriknak iti bagik. Nagbalinak a naulimek ket nataknengan. Maysa a nasayaat a babai a Vietnamese—naulimek a trabahador, nabirtud, saan nga agsasao.

B-2
Siam ken gudua. Siertok nga agpadpadaraak a matay, inuksotko ti akin-uneg a pagan-anayko ket imbaberko iti suli. Diak kayat nga agdanag dagiti dadakkelko.

B-1
Impapudotannak ni nanang iti danum ken inikkannak ti arak, ket nakaturogak. Addaak iti siled iti apartment ni nanangko. Adda collection a comic book. Kinuna ni nanang kaniak “Dimo bagbagkaten dayta baulmo a yan dagiti librom.”

B-2
Kinuna dagiti gagayyemko a binulan kano nga agpadaraka.

B-1
Sumrek a rummuar ni nanang iti mental hospital. Dina maawat a bumalbalasangakon.

B-3
Iti kampingan, imbagada kaniak a diak kano agdigos no kasta nga adda reglak. Pinunasandak ketdi iti antiseptic.

B-4
Dagiti tattao nga agbubuteng, maangotda. Mabutengda kunada ta agangotak a kas lames.

B-2
Agbakuarak, diak makakaan.

B-4
Mabisinanak.

B-3
No dadduma nakalablabaga.

B-1
Kayatko daytay panagregreg ti dara, agregreg iti kubeta. Kasla pintura.

B-3
No dadduma kayumanggi ket maistorboak.

B-4
Doseak idi. Tinungpanak ni nanang ket inikkannak iti nalabaga a kamiseta a kapas. Ni tatang, napan gimmatang iti maysa a botelia ti Sangria.

No comments: