DAGITI SARITAAN TI UKI
Ni Eve Ensler
Inyulog ni Aurelio S. Agcaoili
INTRODUKSION
(*Daytoy nga introduksion ket naurnos para iti tallo nga aktres ngem mabalin nga aregluen segun ti kasapulan ti produksionyo. Mabalin a pagakman ti uray no mano a bilang dagiti babbai).
B-1
Ammok a madanagankayo.
B-2
Madanagankami.
B-3
Madanagankami maipapan kadagiti uki.
B-1
Madanagankami kadagiti kapampanunotanmi maipapan kadagiti uki, ken nangnangruna a madanagankami iti dimi panangpampanunot maipapan kadagitoy. Madanagankami maipapan kadagiti bukodmi nga uki. Masapul dagiti ukimi ti pakailugalaranda kadagiti sabali ng uki—maysa a komunidad, maysa a kultura dagiti uki. Nagadu a kinasipnget ken kinasikreto ti mangbalbalkot kadakuada—kas iti trianggulo ti Bermuda. Awan ta awan ti agsubli tapno mangisarita no ania ti napasamak.
B-2
Umuna unay, saan a kas karina ti mangbirok iti bukodmo nga uki. Adu a lawas, bulan, no dadduma adu a tawen ti palabsen dagiti babbai a dida makitkita ti dagiti ukida. Iti interbiu, maysa a nakaturturay a negosiante a babai ti nagkuna nga adu unay ti pakakumikomanna; awan ti panawenna. Daytay panangmingmingmo iti ukim, kinuna, ket agmalem nga obra. Masapulmo ti agidda a kasangom ti pagattao a sarming a sitatakder iti sanguanam. Masapul ti umiso a posision, umiso a lawag, umiso nga anninawan ti sarming, no kaskasano, ken ti anggulo a yanmo. Pagsikkuem ti bagim. Yarkom nga agpangato ti ulom, ket dusaem ti bukotmo. Mabannogkanton. Kunana nga awan panawenna para iti kasta. Adu’t pakakumikomanna.
B-3
Isu nga adda dagiti interbiu dagiti uki a nagbalin a saritaan dagiti uki. Nasurok a dua gasut a babbai ti nainterbiu. Natataengan a babbai, ububbing a babbai, naasawaan a babbai, dagiti lesbiana, babbalasang, propesora kadagiti kolehio, dagiti aktor, dagiti propesional kadagiti korporasion, dagiti agtrabtrabaho iti industria ti sex, dagiti babbai nga Afrikano Amerikano, dagiti babbai nga Asiano Americano, dagiti babbai a Hispanik, dagiti babbai a Natibo Amerikano, dagiti babbai a Caucasiano, dagiti babbai a Hudio. Ok. Iti damo, saan a kas karina ti panagsao dagiti babbai. Mababainda. Ngem no marugiandan ti agsao, dimon ida mapengdan. Iti limed, paggugustuan dagiti babbai ti agsarita maipapan kadagiti ukida. Maar-arukattotda gapu ta awan pay ti nagsaludsod kadakuada.
B-1
Rugiantay ti sao nga “uki.” Kasla kaun-uni ti impeksion, wenno ngata maysa nga instrumento a medikal. “Pardasam, nars, itedmo ti uki.” “Uki.” “Uki.” Saan a nasken no mano a gundawaymo a baliksen, saan nga agbanag a kas kadaytay sao a kayatmo a baliksen. Sibubukel a nakaum-umsi a sao daytoy, naynay a saan a sexy. No aramatem bayat ti pannakipag-sex, padpadasem ti agbalin a politically correct—“Darling, mabalin kadi nga aprosam ti ukik?”—kettelem ti ganas kadayta met laeng a kanito.
B-2
Madanagankami maipapan kadagiti uki, no ania ti yawagmi ken no ania ti saanmi a yawag.
B-3
Idiay Great Neck, New York, awaganda iti Pussycat. Maysa a babai ti nagkuna a kadarrato idi nga ibaga ti inana a “Saanka nga agpanti no nakapajamaka, basang, ta masapul a paanginam dayta Pussycatmo.” (ubetmo)
B-1
Idiay Westchester, awaganda iti Pooki,
B-2
Idiay New Jersey, awaganda iti twat,
B-3
Adda pay Powderbox, Poochi, Poopi, Peepe, Poopelu, Poonani, Pal, ken Piche,
B-1
Toadie, Dee dee, Nishi, Dinity, Monkey Box.
B-2
Coochi Snorcher, Cooter, Labbe,
B-3
Gladys Seagelman,
B-1
VA, Wee wee, horsespot, Nappy Dugout,
B-2
Mongo, Mooky, Pajama, Fannyboo, Mushmello,
B-3
Ghoullie, Possible, Tamale, Tottita, Connie
B-1
Mimi idiay Miami
B-2
Split Knish in Philadelphia
B-3
Schemende idiay Bronx
B-1, B-2, B-3
Madanagankami maipapan kadagiti uki.
(*Nasayaat no nayonan ti aktor ti personal nga introduksion kas iti, “Dumanonkayo, umaykayo. Makitak nga agpipirutong dagiti adu nga uki ditoy itatta.” Ken dadduma pay.)
Intro-Urmot
Naibasar dagiti dadduma a saritaan iti estoria ti maysa a babai; naibasar met dagiti dadduma kadagiti estoria dagiti babbai maipapan iti isu met laeng a tema, ket no dadduma, ti nasayaat nga idea ket agbalin a nakain-inaka. Daytoy a saritaan ket naibasar iti estoria ti maysa a babai, nupay ti tema ken limtuad iti kada interbiu ken kaaduanna ket saan a nasken. Ti tema kas…
Urmot
Dimo mabalin nga ayaten ti uki no saanmo nga ayaten ti urmot. Adu dagiti di mangayat iti urmot. Daytay immuna ken kakaisuna nga lakayko ket kagurgurana ti urmot. Kunana a nakawarwara ket narugit. Pinalabahana kaniak ti urmotko. Nagbalin a kasla mamom ti ukik—nakadiaya ken kasla maysa a bassit usit nga ubing. Pinaggagaranna. No makiinala kaniak, kayatna a kasla man barbas ti ukik. Maganasan a mangapros ngem nasanaang. Kasla man tay mariknam no kudkodem ti kinagat ti lamok. Kasla man maur-uram. Diakon intulok a labahaek manen ti urmotko. Idi kuan, nagbabai ni lakayko. Idi napankami iti marital therapy, imbagana a nagbabai gapu ta diak kano maited ti pagragsakanna iti sex. Diakon kayat a labahaen ti urmotko. Adda bengngat ti Aleman ti therapist ket agsidsiddaaw (gasp) iti baet dagiti sasaona (gasp) kas panangipakitana ti pannakaawatna iti problemami. Sinaludsodna kaniak no apay kano a diak pagganasen ni lakayko. Imbagak kenkuana ti panagkunak a wirdo ti kasta. Kasla man maysaak a bassit usit nga ubing no malabaha ti urmotko ket diak mapengdan ti bagik nga agboses ubing-ubing ken agbudobudo ti kudilko ket uray no calamine lotion ket saan a makatulong. Imbaga ti babai a therapist kaniak a maysa a kompromiso ti kasar. Sinaludsodko iti therapist no ti panangkalbok ti ukik ket mangigawid iti lakayko nga agbabai. Sinaludsodko pay kenkuana no addan dagiti kaso a kakastoy. Imbaga ti therapist kaniak a dagiti saludsodko ket tibtibnokanna ti proseso. Pinagustuak ti therapist. Sierto isuna a napintas a pagrugian daytoy.
Apaman a simmangpetkami iti balay, kinalbo ni lakay ti ukik. Kasla man maysa a premio a bonus daytoy kenkuana, bonus ti therapymi. Kinartibanna pay iti namin-adu ket adda bassit a dara iti bathtub.Dina pay ketdi nakita gapu iti ragsakna a nangkalbo kaniak. Idi kuan, idi panpandagannak ni lakayko, mariknak ti makasiit a tadem a mangtudtudok kaniak, mangtudtudok iti labus-labus a mimmamon nga ukik. Awanan iti proteksion. Awanan iti kutson.
Naamirisko nga adda ti urmot gapu iti maysa a rason—daytay bulong iti lawlaw ti sabong, daytay berde a paraangan iti lawlaw ti balay. Nasken nga ayatem ti urmot tapno maayatmo ti uki. Dimo mabalin a pilien laeng dagiti parte a kayatmo. Maysa pay, saan a namingga ni lakayko a nangikakaidda kadagiti sabali a babbai.
No comments:
Post a Comment