Alimpatok, 2

Bimmarinduyog ta rupam
Sika nga anghel agkalamri a sikigan,
Agbarabara a paragpag
Kettang agtutubo a baet-sellang.

Ania, ania aya ti nagan
Kasingin ti kadkaduam?

Ti pusom a daplag, narabuy
Laonenna amin a naimmus
Nga ayat, kas iti kimmampuso
A rupam, mangil-ilala iti nakisang
A ragragsak iti sardam nga awanak.

Ayna, ta agayeng-eng aleng-aleng
Ti busel nga ita laeng nga agkabannuag
Sagawisiwanna dagiti alimbubuyog
Tapno mapasamak ti sayangguseng
Ti diro iti iddam, iti sam-it iti ikamen
Iti barukong dagiti siglo a gumawgawawa
Nga awanka ditoy mabibbibi a dennak!

Agindayon dagiti mawaw a bagita
Iti ritmo’t dalluyon iti idda nga agrabrabak.

Aganangsabta, ket tagikukuaennak.
Aganangsabak, ket ikutam ti biag.

Kasano, kasano a sang-aten
Dagiti turod iti barukong
No ti al-alko ket al-almo met,
Daytoy santipikado a rugso
Regget, derrep, amin dagitoy
Amin a paulo dagiti tagainep
Iti man taaw a pakalmesan
Iti man arpadmo a pakatayan?

Ay, ayat a dungngo, dungngo
Nga ayat, sika, sika awan sabali
Ti pagpasagak. Kadagiti angesmo
Ti pammadso dagiti mapuruto
A palludip, wenno agek,
Agragut ta agragut
Ket agwaywayas iti pul-oy
Umagibas ti lamiis iti teltel
Iti beggang ti pus-ong
Santo agtalinaed iti pispis!

Ipapilit ti busel amin a pammadto
Ket ti daan a panagpangngadua
Dagiti di managanan nga alimpatok
Maungawda iti rikna nga agburayok.

Kas iti aldaw nga addaka
Kadagiti manglanglangan
Nga oras, iti arakup, iti imnas
Nagpaiduma a kallaysa dagiti arasaas
Kammaysa ti kararua
Ti sabong kas iti alimbubuyog
Iti rabii a duata a maar-arakattot.


A Solver Agcaoili
Feb 8/08
Hon, HI