Ti Amarilio a Laso a Tantannawagan ti Birhen

1.
Agbalikas ti retrato, ipeksana piman
ti maris nga amarilio ti gulib
dagiti amin a gulib, kas iti laso
iti kanta ti martir a mapasag iti init.

Dua a dekada a kinapimpiman
a ti akinggapuanan ket ti kalaingan
nga anak ti pagilian?

Kasta ti kunada. A pinatitayo met.

Isu a dimmakkel datao
a maymaysa laeng ti ammo:
ti sarita di ugma dagiti utek
nga agkapuyo.

Madagdagullit met ngamin
dagiti waragawag ti kinamaingel,
kas kadagiti medalia
a ganggandiong a balitok ken pirak,
maintar dagitoy iti barukong
ket kunada, wen, aramid daytoy
ti nasiglat a mannibrong
a no agdiskurso ket pagbalinennaka
nga agnanayon nga agmauyong.

Daydi buteng kadagiti rabii
a maguyod dagiti agtutubo
tapno inda agsapata,
sakbay ti bannawag,

agkari iti nainlangitan a baro a gimong,
ayna, inkankanta met dagiti mannaniw dagitoy:

ti barrio dagiti artista itan ti ili,
kuna ti paspasurot a timmallikud
kontra kadagiti kadre ti pangngarig
ti sirmata ket maysa a darepdep
a maysa met laeng a babantot.

2.
Dimo mabilang iti ramay dagiti kakastoy:
dagiti nairanud, kas kadagiti mannurat
iti Amianan a nakipagpiangpiang
iti lamisaan dagiti pakairanudan
sa ita ket kayatda a kantaantayo ida
iti panagdaydayaw, balangatan iti sabong
ti kappakappa, yawatan iti palma a bainbain.

Umagibas amin kaniak dagitoy
iti adayo a lugar a nakaipalladawan.

Ket agluksawak. Ngem siasinno
kadagiti pul-oy ket angin ken tudo
ket baningrot ken estranghero
ditoy ti mayat a dumngeg iti pakasaritaan
ti kinadangkok dagiti sapata a balikas?

Kadagiti eskinita ken puon ti bullalayaw,
ditoyak a mangsirsirig kadagiti paulo
ti damag iti inaldaw-aldaw.

Ti panagkomunion, kas pakagarigan,
dagiti di agmirmiraut a dadaulo iti binigat,
panagipasagidda maipapan iti Namarsua
a no agkibaltang ket testamento dagiti kasabada
kasta met dagiti kontra partido a bul-og
a kadagiti bolsada ket ob-obispo a butiog.

Iti pahina uno ti diario ita nga agsapa
ket ti retrato ti panagtantannawag:
ti nangisit a birhen ni Virginia Navarro
ket iti imatangna ket ti laso nga amarilio.

Naiputipot ti agkayabkayab a laso
iti siitan a barut a pangpugsatanto
iti korona dagiti bannuar ti ilitayo:
isuda nga agmartsa tapno mangisao
kadagiti amin a basol ti palasio kadatayo.


A Solver Agcaoili
Hon, HI
Feb 24/08