Abrakadabra para iti Pagilian

MANILA, Philippines -- Amid mounting calls for President Macapagal-Arroyo to resign, religious leader Bro. Eddie Villanueva has appealed to the country’s five highest officials to sit down and draw up a plan to resolve the worsening political crisis. B. Natividad, Inquirer, 2/17/08


Iramantayo dagiti anito, amin a mangmangkik
Di katatawan, dagiti napanen iti sabali a biag

Iti daytoy a waragawag. Agpasken manen
Dagiti semento iti likod a naap-apan iti diario.

Ta kastoy ti kapay-an ti ili dagiti dagdagullit
A kasasaad: iti tuktok ti kawayan nga isab-it

Ti kadkadua ti anniniwan nga iti naglabas
Nga aldaw ket nangtagikua iti am-amangaw

Dagiti dapo, dandanag iti dardarepdep,
Rangkap amin dagitoy dagiti palimed

Ti kakaisuna a pagilian, il-ilalaen koma
Kas iti tinawid a balitok, gumilgilap a perlas

Ramen dagiti il-iliwen a mapasamak,
Kas iti maudi a salakan iti kaaduan:

Ti panagikkis manen dagiti dalan
Ti panagpuyat dagiti oras iti rabii

A manguray iti nalabaga a bannawag.
Iti karabukob ti maipasngay nga aldaw

Ti baro a lengguahe ti pannakaidasay,
Ti mapadso a rugi dagiti amin a rugi

Iti apokalipsis ti rebolusion a mamamsaak
Kas idi, kas ita, kas iti agnanayon nga awan labas.

2.
Agturong dagiti agpukpukkaw a plakard
Iti nangisit a birhen, isuna a para tannawag

Iti inaldaw-aldaw a pakapilawan, ti saan
A panangikalintegan nga ebanghelio

Ti tured iti panagmartsa. Kasano a maibabawi
Ti sagsaggamaysa a panagagal? Aawan danum

A pagbautisar dagiti dadaulo a buong ti ulo
Pangugas kadagiti imada, dila, mata, agong

Karaman ti rugit a dimket iti muging
Signos dagiti bulas a nakapukawen iti bain.

Agprusision dagiti naridam nga arapaap
Dagiti salakan nga awan iti parintumeng

Ti panagsubli dagiti banderitas nga agiriag
Ti inhustisia a mangkablaaw kenka iti binigat

Maidasar kas pangep-ep iti saraaw
Ken ti kastoy a nakain-inaka a buya

Lagipen ti maiyayab a pagraranudan:
Ti dara, kas pagarigan dagiti marigrigat

Ti pannakettat dagiti tanikala iti isip
Dagiti makipagili iti republika dagiti malas.

A Solver Agcaoili
Hon, HI
Feb 16/08