Apostol a Di Apostol

MANILA, Philippines -- Messages of protest poured in from Manila to Mindanao against Malacañang lawyer Sergio Apostol’s racist remark about NBN-ZTE star witness Rodolfo Noel Lozada Jr. Inquirer, Feb. 10/08

Sika ti bibig ti pudno, apostolado
ti bileg manipud iti balikas.
Panagsaksi ti adda kenka
kas iti panangatiwmo iti kimat,
kemmegem ketdi iti dakulap
samo gemgeman. Kettelem
ti rangaw ti apuy kas iti kuriteb
nga utong a pangdengdeng.
Idulin ti apuy iti bautek ti lagip
ta sadiay a sublian
a pangsinit iti sinal-it a saltek.
Dagitoy tektek a tektek
iti naktidiables a gasat ti ili,
kas iti agsasamusam itatta
a damag. Dagiti kurimaong
iti inda panagkurimes.
Dagiti mannanakaw
iti pagpaggaakda
kadagiti lanlansangan.
Dagiti birkog iti bitlada a:
Nayonantay pay, nayonantay pay.
Awan la ket ti bubussogan
dagiti sarangusong. Uray ti nabanglo
nga angot ti naburibodan nga innapuy,
ina, ama, dida pakawanen.
Ket ti ibit dagiti maladaga, mabisin
iti am wenno kilabban a dinanuman,
umanay la ketdi a pangimameg.
Di met ta awan makimbagi ti ili
no di ti masakbayan? Saan a dagiti kas kenka
nga iti ngiwatmo a salawasaw sumngaw
ti madi a kalak-aman. Kas iti panaguttot
dagiti durbab. Ti panagsuyot dagiti abuyot.
Ti pannakauring dagiti imam: amin
nga agiggem iti uring-uring a sinublan
ket iti ittip makaimatang. Di kadi
ta awan iti dara, iti maris ti kudil
iti sukog ti mata ken ngiwngiw
ti bugas ti kinalinteg? Awan iti gabrang
dagiti sao a maigako ti pagilian
wenno mailemmeng pamsaakan.

Lumtuad ti pudno kas iti rayray
ti dios nga init iti bigat, dioskanto
pay laeng wenno maysa a piman.

Ita, dagiti umili, Intsik man wenno saan,
aminkami ket manglanglangan.

A Solver Agcaoili
Hon, HI
Feb 10/08

A Solver Agcaoili