ALDAW DAGITI NILIONARIO

ALDAW DAGITI NILIONARIO 

(Maisagut ken ballongko nga Alexander Samson Cruz ta paggaayatna daytoy a termino. Kayatko met ta mailemmeng ti panagkurkuranges ken tapno dagiti aminton a nilionario ket agbalin a milionario!)

Iti aldaw dagiti nilionario, awanton mabisin. 
Aminton a gamrud ket mapaksiat iti langit
Sa maitennag iti gungugong tapno sadiay

Sippawenda dagiti kaasi manipud iti indulgensia
Ni manglimlimo a mamati nga agnagan langgong! 
Isu nga iti dayta nga aldaw ket ti padaya

Ket iti dulang ket ti baro a kasaba, kas ti justisia
Ti maipapaidam nga innapuy! Magao daytoy
Tapno masay-up ti bang-i dagiti amin a talon

Ti amaris ken ti ayat daytoy iti kada subo
Kas iti posibilidad ti panagangtab tapno dinton
Agsaraaw. Adu dagitoy a nilionario iti ili

Pimpiman iti amin a kinapimpiman a di man
Laeng maitimkan, di makita uray kadagiti darangadang
A lumgak iti maaronan a dalikan ket ti apuy

Agragragsak nga agur-uray kadagiti umay
Makipunsion. Sabalinto daytoy nga aldaw.
Saan nga aldaw ti langit kadagiti labes ti ulep

Wenno dagiti eden iti mito. Aldawto daytoy
Ti ukom kadagiti agpagungga kadagiti sabadiar
A para koma iti amin ngem gapu iti bileg

Kas ti milionario a balikas, agsalamangka ti abunaw
Mapan kadagiti sementado a kaliehon iti ili
Kadagiti natangig a pagwanawanan tapno sadiay

Bilangenda dagiti maparnuay a nam-ay iti abaga
Dagiti nanang, tatang, kakabsat, isuda nga agbilang
Iti oras tapno makaiyawidda iti sumaruno a pammigat.

Iti aldaw dagiti nilionario, agbabawinto amin
A managdakdakes ket agikissiimda iti nagan
Dagiti maparugma a dios, madusa iti tapok.

Hon, HI
Abril 13, 2013

No comments: