BASBAS TI PARATONG


BASBAS ITA NGA ALDAW. BASBAS TI PARATONG.

Sapay koma ta ti paratong ket mangiburay kenka iti pul-oy tapno iti daytoy nadagaang a bigatmo ket agbalin a napariir.

Sapay koma ta dagiti uong iti paratong ket agtuboda iti oras kalpasan ti kimat ken gurruod ket tudo tapno adda magabutmo a pangtaraonmo iti bagi ken kararuam.

Sapay koma ta dagiti madredekakaw iti paratong ket mangted kenka iti pagsungrod tapno maaronam ti dalikanmo ket tapno malutom sa malinaymo ti nabendisionan nga innapuy a saan laeng a pangep-ep iti bisinmo no di ket mangted kenka iti kired a makidangadang iti biagmo.

Sapay koma ta ti nepnep ket digosenna ti paratong tapno daytoy ket iburayna amin a nabaknang a daga iti talonmo, daga manipud kadagiti lemmeng dagiti kakaykayuan, ken daga manipud iti nagrupsa a bulbulong tapno iti pannakaigamer dagitoy iti dapat ket ti nain-abunawan nga apit iti kataltalonam.

Sapay koma ta kasta.

(Partuat a kararag ni A Solver Agcaoili, Hon, HI, Abril 17, 2013).
1

No comments: