Basbas a Nakabasar Kadagiti Walo nga Angin ni Ilokano

BASBAS ITA A BIGAT. (1)—Kararag a Nakabasar Kadagiti Walo nga Angin iti Kosmologia ni Ilokano. 

Isagutko kadagiti pastor a gagayyem: da Pastor Jesus Salvador Adolfo ken Abril Varilla. Kasta met ken kasin Elmer Agcaoili Palacio nga agpapaay iti Namarsua. 

Mangted koma ti arubuob iti panagungar ti natingrag a bangkagmo tapno dagiti amin nga itukitmo ket agbiag a nasaranta ket agsabong ken agbunga tapno mangted kenka iti taraon ti bagim ken kararuam.

Mangted koma ti amian iti pul-oy a mangisubli iti regta kadagiti takiagmo tapno iti laksid ti dagensen ken buttuon iti aginaldaw a pannakidangadang ket ti nabiag a namnama nga agin-indeg iti barukongmo.

Mangted koma ti dugudog iti pannakariing dagiti uong kadagiti paratong tapno makagabutka iti sangalabba a madengdengmo ken maiparaburmo kadagiti kaarrubam.

Mangted koma ti panaplak iti bayakabak a mangsibog kadagiti kaimmurumormo a bukel tapno agruting daytoy iti umno a panawen.

Mangted koma ti abagat iti nalamuyot a panangapiras kadagiti nakatakderen a bunubonmo a makisinsinnanggol iti maladaga a raya ti ubing met nga init tapno agrukbos dagitoy.

Mangted koma ti puyupoy iti bang-ar tapno ti bannogmo iti tengngat’ aldaw ket makikuyog iti panagligsay ti init.

Mangted koma ti baatan iti darang kadagiti paladmo tapno iti iyaawidmo iti malem iti taengmo ket ti bara nga iyapirasmo iti rupa ti ipatpategmo, wenno iti panangidatonmo iti danum iti altarmo.

Mangted koma ti bulon iti payak kadagiti sakam tapno iti panagdaliasatmo iti daytoy a biag ket adda koma ti agnanayon a pia, regta, ken karadkad.

Hon, HI/
Abril 4, 2013

No comments: