Basbas ti Bayanggudaw


BASBAS ITA NGA ALDAW. BASBAS TI BAYANGGUDAW.

Sapay koma ta ti dana ti biag ket awagannaka tapno ita kasta ket maaddaanka iti regta nga agdaliasat manipud rugi ti bigat agingga iti kaltaang ti rabii.

Sapay koma ta ti lipit ket di mangted kenka iti panagbuteng tapno iti laksid dagiti agsasamusam a karit ket agtalinaed kenka ti kappia iti pakinakem.

Sapay koma ta ti baresbes ket danggayanna ti kada panagaskaw tapno iti kasta ket dimonto marikna ti pannakautoy, ngem ketdi sitatallugodka nga umaskaw pay agingga a matuntonmo ti naikari kenka a balligi.

Sapay koma ta iti panagsublim iti naggapuam, madanonamto pay laeng ti isu met laeng nga espiritu a pinanawam, ket iti daytoy baro nga engkuentro, adda pakasaritaan a masangal.

Sapay koma ta iti panagkawilim ket ti mapabaro a tured tapno iti sumaruno nga awag ti kamino real ti pannakigasanggasat ket ti masindadaan a panagwen iti baro a karit.

Sapay koma ta kasta, sapay koma ta kasta.

(Partuat nga araraw para kadakayo amin, A Solver Agcaoili, Hon, HI, Abril 28, 2013).

No comments: