SAPONG PARA ITI MANNANIW

SAPONG PARA ITI MANNANIW 

(Ken Reynaldo A. Duque, 1945-2013)

Ita ket manindikam iti solo a kandela
Dakami nga adda iti katangkatang. 
Sika ket ti panagsubli iti naggapuan

Ta iti ginget dagiti duadua idi ket itan
Ti sierto a kaikarian kadagiti nalamuyot nga apiras
Ti angin, sadiwa iti barukong nga agledleddaang

A mapnek kadagiti amin a matallikudan,
Dagensen nga ingget bantot nga umanay
A mangtagikua iti daytoy a lubong a nagpasiaram.

Dimon mabasa daytoy a daniw, ngem ammom
Nga adunto dagiti manglagip iti ipapanaw.
Adu a kursada dagiti nagsasabatan

Dana dagiti pangngarig nga iti ritual ti balikas
Ket tinaluntontayo iti walwalang a di agpagungga
Manglimlimo a kanayon iti sipnget tapno iti kaltaang

Ket ti panaginana koma ti aglupoy met nga isip.
Iti ulimek ket nangisuroka kadagiti kinapudno
Iti papel, hojas daytoy ti dokumento ti nagpasaran

Ti puso nga agay-ayat nga idi damo ket dimi
Matukod, di maarikap. Ngem adda dagiti nagan
Kas ti kaadda dagiti lasag iti darepdep, ket iti panagsabat

Dagiti dana ket ti mababain nga isem ti mannurat.
Manninawka iti amin a suli. Iti saripatpat ket
Ti akem ti sao tapno maibunannag ti umuna a ragsak.

Ita, addaka kadagiti kararag, kadagiti rayray.
Addaka iti sapong tapno mapagkitakitan ti lipat
Tapno iti sonata ti isisina ket ti musika ti panagdaliasat.

Balonem dagiti sensilio, petpetam iti dakulap
Ket bayadam ti bangkero iti panangitundana kenka
Iti karayan ti sabali a biag. Metaforaka itan

Kas iti obra maestra nga imbatim. Ditoy a birokenmi
Ti kaikarian ti mannurat iti baet dagiti addaan patingga
A balikas nga iti ipupusay ket agbirbirok iti baro a biag.

Hon, HI/
Abril 7, 2013

No comments: