Aglanglangta kadagiti makalkula a balikas
kas ita. Iti sango dagiti awan nga agbuybuya,
saludsodek kadakuada dagiti naitalimeng
a pateg kadagiti linabag a di met matagikua.
Idi pay a sinursurotka, kunak kenka.
Idi pay a dagiti askaw ket kas iti muriski
ti nalaing a mannalon, padpadronan piman
toy numo a diman laeng maikanawa
dagiti saka kadagiti libtong.
Wenno tay agsuek a witiwit ta di met
ammo nga ilansa dagiti mata ti agmatuon
kadagiti inurit
iti kuaresma dagiti bingkol.
Saan ta di met nabendisionan datao
nga agtagiben kadagiti sinilong
ni naindaniwan nga ayat.
Kadagiti balikas a masanting, ditoy,
ditoy nga aglaing ti addaan mamaitna
a rikna nangnangruna no ti adayo
ket umasideg a panagaripapa
aginnga a masappuyotak
iti limdo, amin a limdo, ililidak kas
iti wangawangan dagiti tanem
tapno isaruanak dagiti nakamassayag
a bullalayaw iti sementerio dagiti apro
nga iti surnadan maiyatang
kadagiti ansisit a mangiyaw-awan iti agmatuon
kadagiti estoria ti panagkamkamat iti angin
kadagiti panagsagawisiw iti ubing a sipnget
a pangiyaw-awan iti agbalay a sidunget.
Rugianta ti biograpia dagiti daniwmo
kadagiti lagip iti Tapao a Santa Romana,
ti lugar a kas ina, ti ina a kas lugar,
naikaipasngayan dagiti amin a kari
dagiti agsapa a mailibay.
Yantangay pinanawam
ti kadkadua, yantangay
imbatin amin a karkarma
dagiti anniniwan iti rabii a saragisag ti bulan,
mawanawanam ti ladawan
ti baybay kadagiti amin a siit a rosas
iti aringgawis nga iballawes ti narungsot
a salidummay a maysa met a pannakapaay.
Ngem agsulbod ti mamuriski
a barsanga, dinto kaano man
mamingga a barsanga
iti linnaaw a makimalmalanga:
agumbi kadagiti pangrugian
ti biograpia nga agkanaganan.
Hon, HI
Sept. 24/08
