isu ti ay-ayam
nga abalbalayentayo
pangsulisog iti gasat,
daytay man naimbag,
datayo nga agar-arapaap
kadagiti nasaysayaat
a panawen kadagiti nasaysayaat
a klima uray no kumugtar
ti lamiis ti angin,
daytay nakapigpigsa
tapno busalannatayo
iti ditay panamati
iti daton dagiti numero,
dagiti umuna tapno manen
mangnamnamatayo,
ti mega a numero
tapno makitatayo
ti kari dagiti amin a
mabalin kas iti pamsaakan
ti kalakayan kadagiti tallo
a lallaki nga agar-arapaap
kadagiti panangabak
pannakawanwan
kadagiti taeng ken lugan
para iti dua nga ub-ubing
panagtagtagainep
iti naunday a bakasion
para iti tallo tapno paginanaen
dagiti nabannog a tultulang,
bannog gapu iti panangibaklay
kadagiti pagpulkokan
iti lagip ti pannakaatiw
ken panagayat koma
a maigulpi tapno kaskasdi
ti panangsustini
iti biag kas iti ayat.
quick pick ti pamay-anmi,
kankanayon a lump sum
tapno mairanud iti buismi
dagiti amin a kadua
nga agar-arapaap
iti nabayagen,
dagiti agbirbirok iti gasat
kadagiti bituen ket sadiay
a biroken ti lawag
kadagiti anniniwan ti bulan,
parmata sagpaminsan,
bugas ti kina-
isu-met-laeng-nga-isu
ti ay-ayam nga abalbalayenmi
iti panawen dagiti bagyo
dagiti nagabuyo a darepdepmi
iti daytoy a siudad
ken pagilian a nakabirokanmi
iti bukod a bagi ken leddaang
kuarta ken salamangka
panungpalan ken regget
isu nga agay-ayamkami
kadagiti numero,
a kasla pot luck.
ipisokmi amin
dagiti tartaraudi a doliar,
pagtitiponenmi amin
iti kararag ket iti daytoy
a rabii dagiti nabaybay-an
a pampanunotmi,
makitami dagiti numero
a mangikeddeng iti panagari
dagiti ari
dagiti birkog
dagiti suitik
ken kinaasi.
Aurelio S. Agcaoili
Torrance, CA
Okt. 2005
No comments:
Post a Comment