No apay nga agbanag a mannaniw
Ni migrante iti amin a sulinek
Ti kuadrado a lubong
Exilo a burburtia daytoy.
Adda aglemlemmeng a daniw
Iti amin a kailian
A nakasursuro nga umaddang
Nga umadayo
Iti balay dagiti estranghero
A kari ti kanam-ayan
Iti iriridep a maminsayud
No kasta a mautoyan ti isip
Iti panagbirbirok iti salakan
Ti nakasalda nga innapuy ken masida
Iti pagilian a pinanawan
Ket no dadduma,
Saanen pay a sublian.
Awanan imbag ti gapu
Kas iti pannakabangles
Ti namnamaen nga ittip
A laokan iti danum,
Piritan iti asin,
Pakuyogan koma iti kararag
Tapno makagteng
Ti diaya a regta
Ti makan kadagiti urat
Iti panunot ken iti lasag
Iti imatayo,
Datayo a nakasanggir
Iti lamiis ken leddaang
Ti agwalangwalang nga angin
Ti agwalangwalang a rabii
Ti agwalangwalang nga agsapa
Ti pannakamurmuray
Iti daraan a partaan
Kadagiti protesta ti linabag
Iti makankanion a protestador
Iti Malakaniang wenno
Iti Plaza Miranda wenno
Iti Welcome Rotunda
Ti adun a pannakidangadangtayo
Iti gawat ti pudno
Kadatayo, datayo nga agalmusar
Iti apges ti rusoktayo
Ti naisangsangayan a liday ti dulang
Ti imahen ti tig-ab ken maysa pay
Ragsak met iti panagingat.
Ammotayon
A ti dadaulo dagiti daniw
Ket mairaman
Iti di namnamaen nga arapaap
Nga adda pakabuklan
Dagiti linabag ken bersikulo
Ti pannakaisalakantayo iti pagilian
Datayo a nabayagen nga agar-araraw
Ken agkarkararag para iti rikna
Ti pannakabsog saan laeng nga itatta
No di ket iti amin a panawen
Saan laeng a para iti bagitayo
No di ket para kadagiti an-annak
A tumrarong iti baro a derrep.
Isu a dagiti migrante
Aminda ket mannaniw
Ti yaadayo ket leddaang
Ti tudo iti kalgaw
A mangbisbisibis kadagiti saotayo
Nga agbalbaliudong
Agpaspasiar kas kadagiti aldawtayo
Nga ikis-ikisantayo
Iti kalendario a kasingin
Dagiti agal-alangan a duaduatayo
A kunam la no ti sungbat
Dagiti panagkapuy ti rikna
Ket sangasiglo manen a panagur-uray
Ti baro a pannakigubat
Ti agdandaniw a pungtot
Panagunget ti pagsasaotayo
Panagbirbirok iti wayawaya
Iti nakakarsel a lagip
Iti nalabbaga a pangnamnamaan.
Aurelio Solver Agcaoili
Carson, CA
Oktubre 2005
No comments:
Post a Comment