Daraan ti gatas
Nga in-inumen
Dagiti putottayo.
Impatlida ni Ka Fort,
Dadaulo ti laingtayo,
Ulo-ulo met ti riwriw
A mangwayawaya a sirmatatayo,
Isuna a nagpaay a sungsungtayo
Iti panagiyalikaka iti pagimbagan.
Darana ti inggamer itatta
Dagiti pasista
Iti gatas a nanamem man
Dagiti ubbingtayo.
Dua laeng a panakpak
Ti paltog iti dayta nga aldaw
A panangbaybaybayna iti dalan
Nga agtunda iti kiki
Ken pauyo ti apoko.
Kastoy itattan ditoy pagiliantayo,
Kastoy ti panangikipasda
Kadagiti ararawtayo.
Itsapueraen ti mammapatay
Ti likko a rikna
Dagiti propeta ti buteng ken ulbod,
Isuda nga abuyot ti amin
A panaguttog dagiti sisusugat
Nga agpatnag ti kigaw nga ayat,
Kasingin dagiti amin a di umiso
A tagikukua dagiti dalan
Nga agtunda iti kananakem
Ti naimot a waywayas.
Sulpeng ti kalsada
Iti puersa ti ranggas iti dayta
A panaginnagaw
Ti sipnget ken lawag
Iti piketlayn ti Cabuyao.
Di met marikna ti agkabannuag
A rabii ti pukkaw ti balligi
Iti bala iti barukong
Ti naidasay.
Binaybay-an ti rabii
Ti panagkaradap ti dara
Iti paggatasan.
Inton bigat, ilakoda ti gatas
Kadagiti inna nga agtagtagibi
Iti kinapalalo ti rinnanggasan.
Aurelio Solver Agcaoili
Los Angeles, California
Setiembre 23, 2005
No comments:
Post a Comment