Ti Sagrado a Balikas ket Maysa a Kadre

(Sungbat iti daniw ni Ka Loren a "Maestro ti Dangadang," Feb 20/08, iti blogna a www.hanseman.wordpress.com)

Maysa a kadre ti sagrado a balikas,
Ka Loren dagiti amin a rebolusiontayo,
iti man puso wenno iti gatilio.

Nakaadayon dagiti lagip,
immagibasda a pilit
kadagiti avenida

ti karkararag iti kumbento
dagiti kinatakrottayo
iti bunggaria dagiti nabaked

a pader dagiti seminario
dagiti pulkoktayo, datayo
nga agbibiag iti hostia ken gulib.

Ngem asidegtayo kadagiti sulisog
ti balikas kas iti ulbod:
ta kasano a paaduem ti tinapay

no dagiti binukel ti mais
ket kadagiti restoranda
nga agsalakan, kadagiti bibig

dagiti babaknang a subo a subo
a di agngalngalngal
ngem di met maltutan.

Adda ngamin rapas a bibig
rapas a boksit ti butit
rapas a panagimutektek:

ingkipasan iti amin
iti kuntimpas domino
dagiti minimini ti awanan bain:

dagiti bukatot, kas paggaamo,
a no agnganga kasla sudo
wenno daytay buttaw a sako

dagiti agpuerong a hasiendero
dagiti sementado a pagmulaantayo
kadagiti maapit a sasainnek

ti anak a mabisin kas iti ina a mabuteng
ti panaglagaw ti ama iti panangkamkamat
iti kasungani ti panagngilin dagiti pariok

wenno panangpiangpiang dagiti bandehado
a makikinnawiwit iti paspasablog
dagiti maar-arakattot a panagbubussog.

Naktidiables la ketdin a biag
ta uray ti karkarna a panaguttog
pawilan pay dagiti naarog

a no gumarut ket aglastog:
kas iti panagbuya kadagiti suitik
iti parang ti nengneng a telebision

Lozada kontra kadagiti batalion
dagiti mannibrong a di agdiosporsanto
Lozada kontra iti sekretario dagiti di aghesus

iti pammateg iti ili a di met mairusok.
Ngarud, pasublientayo a babawien
ti sagrado a balikas ti masa a din muttaleng,

datayo a nakamurmuray, panawenen.
Ditoy ti salakan: kadre ti sagrado a balikas
a mangisuro iti kakaisuna a panungpalan.


A Solver Agcaoili
Hon, HI
Feb. 21/08