Iti Nagan ti Rebentador

Two of the most popular firecrackers are the “Ampatuan” and “Goodbye Gloria,” which pack so much punch and explosive power that they can shut off street lamps, trigger car alarms and shatter glass windows. Ric Sapnu, Philippine Star, January 1, 2010


Iti nagan ti rebentador ket duakayo:
singin a berdugo dagiti amin a namnama
dagiti pimmanaw tapno agsubli
ngem iti panaglagaw dagiti aldaw
ket dinton mamati kadagiti bingraw
wenno egges wenno iti bugiaw
a kari ti palibbaangen nga Ampatuan
wenno ti masindian a Goodbye Gloria.

Iti aripit ti nakapasagan, ditoy
a mangur-uray ti Ampatuan
ti Goodbye Gloria iti baro kanalbuong
tapno agkamata koma mangmangkik
iti maysa a tawen a biag
ket ti timbatimba
a dara dagiti maidalit a gartem
tapno iti panangisakada kadagiti tagainep
ket ti embalsamado a maminribu a gagem
dagiti Ampatuan ken Goodbye Gloria
a no agbettak ket bukiradenda
ti sentido dagiti agmutmuttaleng a masa.

Mano nga ima
mano a barukong
mano amin a sellang ti ratraten
dagitoy a didigra manipud
iti buteng iti masukatan a tawen
tapno kadagiti selula ti bannawag
a kadagiti gumawgawawa
a tanem ket ti agpapauray a bangkay
dagiti salemsem iti kartaan nga uray
iti panakpak ti palibbuong
ti mammapatay a bala
ket ti agungarto a sakit ti nakem
dagiti naipatli kas pinanawanda
a lagip iti namnama
iti kaidatdaton nga atang kas iti kinalinteg?

Ampatuan ti awag
iti mangidagel
a paputok.

Goodbye Gloria ti birngas
dagiti amin a dagensen
nga iti barukong
ti bigat ket nasken nga iparaut,
igalut kadagiti amin
a sulinek ti ili
tapno iti makaulaw
a panagrikusrikos
dagiti lamlamiong
ti bulbullagaw a papauyot
ket ti matebba a lambaan
nga iti pitupulo
ket dua a seliado a lungon
ket padagsen
ti agharakiri a buyok.


A Solver Agcaoili
Marikina/Enero 2, 2009