Ayat-a-Basol

Amor es pecado.
--Amores Perros/Love is a Bitch


Basol ni ayat, sitsitik.
Kabaelanna daytoy

ti agputar dandaniw a rabrabak
sinsinan a takneng tapno ipanagan

iti agraraman a bituen a manglulem
iti rabiim a laklakaddugan: daytoy ti ayat

nga iti estranghero nga idda
ket agbilang kadagiti alimpatok

dagiti rugso ti pammakada
kadagiti panaglabsing kas

panangkamalala reglamento ti burburtia
nga iti versikulo ti daniw a nalinteg

ket adda kadagiti makusen
a lino a ti al-almo ket ipeksa.

Pagpuligosem kas sirkero
ti naimbag a damag

kadagiti aguttog a buyot
dagiti niloloko a kassaba,

kas iti pamutbuteng, madagdagullit,
ti manglimlimo nga evanghelista.

Sika daydi mannaniw a sitsitik,
kadagiti bainbain, kapuriketan

sika daydi mannaniw a talangkiaw
nga iti salamangka ti saom

ket ti agdadata a panangiyaw-awan.
Aglibakkanto iti pakasaritaan:

iti kanito nga agtaraok ti kawitan
ilibakmonto ti nalpay a rugso

kadagiti agrakrakaya a sellang
isikapmonto nga iyarapiras

mailiw iti talged nga imam
kadagiti versikulo ti santilmo

a kakunsaba kadagit amin
nga aramid nga iti tarabit a pug-aw

ket namak pay a pagngawngawam.
Ta kasta ngarud ti ayat-a-basol:

aramidem nga artek a mannaniw
ti parawpaw a kabinnulig iti angol

a kadagiti paulo ti sinsinan
a daniwmo ket ipanagan iti piman

laeng ta makaduam iti alimpatok
nga iti anagna ket ti barangabang.