Rambol

Karambola ti lengguahe
ti naimbag a gasat
a naisangrat kadagiti bituen.


Ita ket lotto 42
sa lotto 45 inton bigat
sa supperlotto 49

dagiti amin a sammaked
tapno iti labes dagiti rigat
ket ti panagarapaap

nga iti darundon dagiti malas
ket ti perdigana ti rebbengna
a ragsak.

Kas iti panagsabong sagpaminsan
ti dama de noche nga iti panangiyawid
iti lagip ket ti ayamuon ti narasay

a panagsubli kadagiti nangina nga aldaw
nga ul-uloden ti anniniwan
tapno makasubad datao

kadagiti naimbag a nakem
kadagiti rabii nga iti bartek
ket iti parbangon laeng
a mausawan kadagiti pannkaiyaw-awan.

Ket ita ti aldaw ti Mierkoles ti rambol
iti sumuno kadagiti panagrennek
iti saot' dakes: laeng ta maipeksa

dagiti amin a sakit ti nakem
nga iti isip ket sabidong a balinsuek
tapno ti numero iti tagainep

ket iti tarheta ti baro a gasat
a maimarka iti tawen ti purpuriket.

Iti pila dagiti agbirbirok iti suerte,
ditoy a madiskubre dagiti rikna
tapno pabaruen ti panangilala

kadagiti balabala ti panagwayawaya
manipud kadagiti numero a marambol
kadagiti kari ti maikadus a sunganit' basol.

Aprosan ti urnos dagiti numero
ket inanamaen ti pugto a paulo
ti maiwaragawag nga agpugpuga

nga angol dagiti maatianan a bisukol
a koma kadagiti paspasmok a pagkarasan
ket ti kisang ti adda iti pagramaan.

Ibbung, kunaen koma, iti bagi kas iti pila
dagiti kas kenka. Ngem a ta sibibiag
dagiti kasaba ti umadanin a buslon
dagiti numero a dikta
ti diosa a karissabong.


A Solver Agcaoili
Divisoria/Enero 6, 2009

No comments: