Batibat

PORT-AU-PRINCE, Haiti – The children with no names lay mute in a corner of the General Hospital grounds Tuesday, three among thousands of boys and girls set adrift in the wake of Haiti's earthquake. V. Sequera & B. Fox, Associated Press, Jan 26/10

Nagtalapuagaw kadakuada ti lengguahe
ti didigra. Adu a pannakatay
a masapul a maumrasan kadagiti lua,
madayasan kadagiti basi tapno
mapasubli ti nakem iti agdama.
Awagan man dagiti arutang a mapuoran
dagiti apres a maiyayus iti taaw
dagiti pulikkaaw nga iti apagdarikmat
ket ti apagapaman a panagliway
dagiti dios nga iti rekkang
ti danum kas iti teppang
ket ti mailumlom a kinapimpiman
tapno manen iti madagdagullit
a ritual ti panagbalin nga umel
ket dagiti balikas nga awanan
kaipapanan. Kasano, kasano ngarud
nga isawang dagiti awanan iti kaes-eskan
a ladawan nga iti alintatao ket
ti lagip a di mamakawan?

Ngarud ta agmamayo nga agmalmalanga
dagiti napanawan. Saan a masapulan
kadagiti waragawag ti biag a naiwalang
a ti nagannak ti akinkukua nga iti daytoy
a walang ti likkaong a kalsada ti kadua,
kabinnulig kadagiti ibit nga inulila
ti soltero a panagmaymaysa.


Hon, HI