Ammo ni Santino Dayta

Ammo ni Santino dayta.

Ti panagarapaap iti kinapimpiman
tapno iti numero a mabalasa
ket ti gasat a di maiyaw-awan.

Ammo ni Santino dayta.

Kas ti obrero nga iti maysa
a pannakibaka ket ti pustana
iti buenas, sika, iti laing
ni Santino, ken ti ladawan
ti sangadangan a pirak,
sika ket makipili kadagiti padam
nga agkumbulsion
iti nagan ti areglo dagiti numero
nga iti ramay ti manangngaasi
a Dios ket mapuntaan.

Ammo ni Santino dayta.

Ti panagbusi iti balikas
no lima kadagiti numero
ket iti palad agbakas,
agsiasi kadagiti linia
iti nabun-as a dakulap.

Ammo ni Santino dayta.

Ti agpalpalama ket ti mapalpalaam
a maregmeg iti padaya dagiti babaknang.

Kasta ditoy ilim, kas iti pagiliam.

Ammo ni Santino dayta.

Ti maregmeg ti panggatang
iti karurua ti masakbayan.

Honolulu, HI