“Why will I withdraw? No way. No way,” he said. “I have a contract with the Filipino people—till death do us part.” Erap Estrasa, Inquirer, Jan 21, 2010
Adda kontratak iti masa
kas kadagiti mannaniw
iti Ilokano a talanggutang
nga iti rugi dagiti pangngarigda
ket ti batobalani ti bitla
nga iti agsaraaw a nakem
ket ti pangep-ep rusok
nga uray laeng nabara a sao
ket makaanay a mangatipa.
Kasta dagiti agmirmiraut:
maysa laeng a lamlamiong
umanayen a malipatanda
panaas ti isip tapno iti likud
dagiti kakastoy a sao
ket ti agraraip a patpatiray-ok.
Ikarik amin a mabalin nga ikari.
Ti kinalinteg, kas pagarigan,
uray no diak ammo no ania
daytoy ti inna kaiyulogan
kadagiti umili a kadagiti iskuater
ket piman a ditoyda nga agbilang
iti panaglangan iti isu amin
a mabalin a libtawan:
maisakmol, kas pagarigan
wenno bendision ti padi
tapno iti langit dagiti kakastoy
a kinaawan ket ti kinaadda
dagiti sinandios a mangiyaw-awan.
Ti demokrasia, kas pagarigan,
tapno dagiti amin a panagrigrigat
ket adda kadagiti sangasapulan-
sangaapuyan ket paaduen pay
piman dagiti bilang kas kadagiti
agadu a sasanto a pagparintumengan.
Ti tagtagainipen a kappia, kas pagarigan,
nga iti laeng naliday a tanem a mabirokan,
ta kadagiti darikmat dagiti maarus
nga ayat, dagiti magabay a panangipateg,
adda ditoy dagiti babawi a siak, siak laeng
koma ti mabutosan a mangisalakan.
Isu a daytoy ti ultimo a makunak:
adda kontratak iti masa ket ninto kaano man
ti masa ket siak ken siak ti masa
diakto inggaan ti agpabutos nga agpailayon
tapno amin a takneng kukuakto manen
tapno amin a pammadayaw kukuakto manen
tapno dagiti asintado a lagip dagiti karsel
ket iti pakasaritaan ti nadayaw a kas kaniak
dinto kaano man maipalagip iti sapasap.
Honolulu, HI
No comments:
Post a Comment