Berdugo

They begged for their lives…(but) they made sure no one would survive.


Mayor Sangki’s testimony, Inquirer, January 13, 2010


Berdugo nga agdadata
dagitoy a testimonia
a sumarut uray
iti tulang, umukuok
uray iti suli dagiti kuadrado
a buteng kadagiti bala,
kas iti mariput nga imbag
iti sango ti agkiet a rikna.

Kasano nga isubli
iti dati met laeng a puesto
iti bangabanga
ti naburayrayan nga utek
a kadagiti gumawgawawa
a didigra ket kaing-ingas
dagiti amin a pananggudas
kas iti gulib ti ili
nga addaan iti birngas a ranggas?

Kuna ti saksi: nagpakaasida.

Inawaganda ti nagan ti Alah
a manangngaasi, nagorasion
iti bendisionna a kappia
iti puso, kas iti kararua
kas iti panagtalawataw ti kebbakebba
iti barukong tapno ti isem
ket kadagiti bibig nga agapon
tapno iti sumuno nga aldaw
ket ti garakgak kadagiti balligi
a ti nasion ket agsagrap.

Ngem kastoy ti pasamak:
ratraten ti rifle nga agpanakpak
ti maudi a selula ti namnama
nga agbiag tapno ti lasag
ket ti narabaw a tanem
sadiay nga agipalawag
no apay nga iti ili ket ti turay
dagiti bambanti ti agari
ti bileg dagiti awan asi
daytoy ti pammati.

Mano a kandela
mano a kararag
mano a biag a maipatli
tapno iti udina
ket ti panagkawili dagiti rikna
nga iti kaunggan ket tani?


Honolulu, HI