PORT-AU-PRINCE — Desperate Haitians used corpses to set up roadblocks as anger and despair at the trickle of aid mounted on Friday and rotting bodies littered the streets after a massive earthquake killed tens of thousands of people. AP, Inquirer, Jan 15, 2010
Daytoy ti baro a pagbarikada:
agruprupsa a bangbangkay
nga iti ginggined ti Port-au-Prince
ket ti salamangka ti karasian a biag
nga awanan patinggana.
Iti Haiti daytoy a buya,
ti lugar nga agal-alawaaw ti grasia
iti nabayagen a panawen
sipud pay nga amin a manakem
ket iti ikub daytoy a nagpapas
bannog dagiti nangisit a babaonen
sakripisio dagiti nangisit nga adipen
biag dagiti maisakripisio a biag
iti nagan ti wayawaya a di sinsinan
pammati iti Dios, kas pagarigan
biag a ditoy ket ti musika ti kabinnulig
iti rabii a nasipnget a mangriing
iti agdudungsa a bitbituen
silnagan dagitoy dagiti taaw
iti aglawlaw tapno mangisagut
samiweng pannakaisalakan.
Ngem ita ket ti sugat.
Ket asinanda dagitoy,
tapno dagiti bingraw makaramanda
iti adat iti lasag dagiti marigrigat
a makaammo unay ti kaes-eskan
ti siglosiglo a kinakurapay
a di met uray leang iti maysa
a darikmat ket dinardarepdep.
Alaenda ti aweng dagiti agpakpakadan a lasag
dagiti pimmusay tapno iti kaunggan a buteng
sadiay nga aglansad
sadiay nga agbirok iti kappia
kadagiti rekkang ti solido a danum
ti likido a daga nga iti apagapaman
ket marunaw a kas iti bain
dagiti agbebessag a kolonisador nga ita
ket kunam a dida sibabasol.
Gargari laeng ti panagbalse
ti daga tapno iti kaunggan
ket ti paripirip dagiti aginkukuna:
dagiti dadaulo, kas pagarigan
dagiti pimmanaw a mannibrong,
kas pagarigan:
dagiti agsubli iti eksena ti didigra
tapno ti gundaway saan a mapitutan
saan a mauma uray kaano man.
Honolulu, HI
No comments:
Post a Comment