Agwarsitayo iti Bagas

Agwarsitayo iti bagas, bagas a baak

Pangbugtak kadagiti karkarna ti bislak

Daytay pangitali iti sangasako a ragsak

Sandi dagiti arapaap a mailusaklusak.



Agwarsitayo iti bagas, bagas a baak

Yunatayo dagiti diputado dagiti libak

Dagitay man nakakurbata nga aginsisiglat

Mangumkomision iti kinirog a rigrigat.



Ay, agwarsitayo iti bagas, bagas a baak

Isarunotayo dagiti senador dagiti beklat

Warsiantay ti senador, sapsapuen ti akak

Agas buy-ong a di nagbannog, agas ti kirat.



Ay, agwarsitayo iti bagas, bagas a baak

Iramantay ti palasio dagiti kari ti perdi a pirak

Ti palasio a kasingin dagiti naisalda nga utek

Ti palasio a Malakaniang ti arestado nga agek.



Ay, agwarsitayo iti bagas, bagas a baak,

Pangpadisi amin a mangmangkik, amin a sinalbag

Dagitay man paraimula iti buteng iti bayakabak

Mangibalud iti pagguuray a bendision iti agpatnag.



Ay, agwarsitayo iti bagas, bagas a baak.

Warsi a pangpaksiat kadagiti saraaw ti pinggan

Warsi a pangbuggiaw mannanakaw a kaibaan

Saraaw ken kaibaan, kontra signos ti paggaak.



Ay, agwarsitayo iti bagas, bagas a baak

Nasamay daytoy a pangdalus di ikankano tulag

Nasamay a panagpartuat manen iti baro a biag

Sandi't inarasdasda nga aldaw a napusaksak.





Aurelio S. Agcaoili

Torrance, CA

Nob. 25, 2004

No comments: