Paskua 2004 iti Siudad dagiti Anghel

Kastoy ti Paskua iti ballasiw dagiti lagip.

Nalamiis dagiti rabii, mangilalaem ti isip.

Bilangen dagiti agkaroling a kundidit iti sipnget,

Birdabirdayen ti kari a nangilemmeng iti langit.



Kastoy ti Paskua ditoy iti likmot dagiti suli.

Iti temtem, agbasingbasing ti lamiis ti adigi.

Kumagay iti darang, kumarayo ti asi iti bagi,

Sanggolenna ti rikna ti ama a mabibbibi.



Kastoy iti Paskua iti ballasiw dagiti apagapaman.

Agparang a kas anghel a kasisigud dagiti ladawan,

Ray-aw a riwriw dagiti pinanawan a pagsegseggaan,

Mangimuttaleng a mangipauna iti pagragragsakan.



Kuna ti tagibi, ti noche buena ti paraitudo

No sinno ti awan, no sinno ti parparato,

No sinno ti simmangpet, no sinno ti agapo,

No sinno ti adayo, no sinno ti makapudno.



Kuna ti maikadua a bunga, uray ta maminsan, ading

Maysa nga aldaw a panaginnaddayo a panagngilin,

Kabigatanna, saanen a Paskua, saanen a mabalin,

Maysanton a sennaay a sulnit ti panagwingiwing.



Kuna ti inauna, ti makaawat kadagiti sagawisiw,

Awan ti Paskua iti aldaw ti di panagbalbaliw,

Awan ti Paskua iti kanito dagiti rikna nga agkissiw,

Adda ti Paskua iti panawen dagiti ayat a maaw-awir.



Kuna ti inada, ti anibersario ti sakbayan,

Panagsagana iti kigaw nga aandingayan,

Padanonen ti kaippasngay iti balitang,

Tagibien iti adu a lallay a pakailalaingan.



Kastoy ti Paskua iti siudad kalamrien nga aanghel

Paskua a kinaawan ti sidong maipagpanpannakkel

Paskua a pannakilantip iti Sao ti Mannubbot

Paskua a panagaskaw kas iti addang ti Tugot.





Aurelio S. Agcaoili

Torrance, CA

Nob. 10, 2004





















No comments: