(Para ken Anib, putot ti rebolusionario a rugso)
Putotnaka itan ti panawen, sika a bunga dagiti kas-ang.
Kas idi punganay, karawaem dagiti allintok iti balitang.
Maysa-dua, agduadua nga addang, isemam ti tangatang,
Sika nga inanak dagiti derepdep nga agkatangkatang.
Ala ngarud, barok, sikanto kadi ti mangilaklam-am,
Agbalin a diputadomi iti riniwriw itan a dangadang.
Birokemto kadi dagiti tugot dagiti adu nga ammam,
Dakami a makipagputar iti daradara a kaipapanan.
Ala ngarud, barok, sikanto lattan ti mangiramraman,
Mangikasa iti pistola kadagiti naidaniw a pagbabakalan,
Mangitagbat iti kampilan iti gibus dagiti pakasaritaan,
Mangitangguap iti basi ti balligi iti paulo ti dalidallang.
Sikanto latta ngarud, barok, ti markado a gerero iti walang,
Daytay man mannakibalubal a mangbirbirok iti kaipapanan,
Makisingnanggol kadagiti mannibrong a rabii ken kaibaan,
Makikontrata iti maiparipirip a balikas iti naladaw a sardam.
Yagawam ngarud ti agallintok, yagawan ti umaddang,
Sika a putot dagiti adu nga innam a mawayawayaan,
Sika a saksi ti adu unay a paidam ti agtalimudaw a dulang,
Sika a karab-as dagiti rikna a mangikamakam iti leddaang.
Agallintokka iti bannawag, agallintokka iti puseg ti awan,
Sika a bannuarmi, mangisawang iti pannakaiwanwan,
Sika a tagibimi, mangirakurak iti pinal a pannakaisalakan.
Sika a kukua ti ili, kontra-signos ti pannakaiyaw-awan.
Aurelio S. Agcaoili
Los Angeles, California
Estados Unidos ti Amerika
Nobiembro 10, 2004
No comments:
Post a Comment