Ti Abril Dagiti Daniw

(Para ken Abril, Mannaniw; panagdawat iti dispensa

gapu iti pannakalipat iti apagdarikmat)




1.

Apokalipsis ti suratmo, kabsat

Paripirip nga adal

Manipud kadagiti rekkang

Dagiti nalagalaga nga ayat,

Pangiyiladan iti duri a pilkuen ni rigat

Manipud kadagiti sagawisiw

Iti buddak a sipnget

Dagiti antigo a tagainep,

Timek a panglamlamiong

Iti mabibbibi a rikna no

Dumuko dagiti dudungso

Kalpasan ti nalabon a padaya

Dagiti linabag ti napalabas, padaya

Dagiti tineggedan a paggaak

Dagiti makilumlumba iti oras

Ditoy a disso dagiti de-rosas

Nga araraw para iti kalkalainganna

A pannakatupektupek dagiti isem,

Pannakabsog, inana, ridep.



Anian ta iti agpang ti Malasiqui

Ken tay ili ti Cagayan a nagabrasaan,

Adu ta adu dagiti sao a nagkurang,

Panunot a nagkibaltang,

Isip a nangiyaw-awan,

Nakem a pinanawan,

Lagip a kinamalala dagiti sabali pay a sao,

Balikas nga aramid a rangtay metten

Ti ginasunggasut nga ipapanaw,

Ti ginasunggasut met a panagkawili

Tapno itagbat manen kadagit ladrilio

Dagiti siniglo a saritatan ita

Dagiti isawang a nasken ken rumbeng

Dagiti isawang a nasken gapu ta rumbeng

Dagiti isawang a rumbeng gapu ta nasken

Kas ti panangitukit dagiti lagip

Iti bengkag dagiti umanangsab a tagainep

Dagiti mannaniw a nakamurmurayen a kas kenka

Dagiti mannarita a nakariingen a kas kenka

Dagiti kabsat a sindadaan a makigamulo

Iti awanan gibus a panagitukit a kas kenka!



2.

Awatem ngarud, adi a mannaniw,

Daytoy anting-anting manipud iti padeppa

Dagiti sarindaniw a nailansa.

Addaan bileg daytoy anting-anting,

Kas ti bileg dagiti orasion a nagapon

Kadagiti trianggulo a bendision

Dagiti dios a nakabakasion,

Agilad-iladda man ditoy kapanagan

Dagiti mannanakaw iti aldaw,

Mannanakaw kadagiti raya ti agsapa,

Daytay mangisagot iti bara iti ulila

A barukong, derrep met a kasingin

Dagiti makatalimudaw a pannakaisungsong

Dagiti saoyo, dakayo a mannaniw iti sardam,

Dakayo a sandi dagidi mannaniw iti paraangan,

Dakayo a bugawbugaw ti kananakem

Dakayo a mangikarkari iti makaagas a saem.



3.

Agkitatanto man ngarud, adi a mannaniw,

Kadagiti paulo dagiti putarem a pasablog,

Panggutigotmo iti rugso a matmaturog.

Ngem yagawam kadi, adi a mannaniw,

Yagawan nga igamer iti putar a daniw

Daytay apokalipsis ti sisusugat a paliiw.





Aurelio S. Agcaoili

Torrance, CA

Nob. 19, 2004









2 comments:

abril said...

manong...manongko, aya, di mabubos a panagyaman 'toy daniw a sagutmo itoy numo, wen, manong, talaga a nabayagen daydi naudi a panagkikitatayo, ngem nagtalinaed nga umang-anges iti lagip dagiti diskurso ti rebolusionario a daniw a lekturam idiay malasiqui...iti sabali pay a lekturam idiay ballesteros a nangtrataram iti gidiat ti prosa ken daniw, a nangkatawaak met iti bagik iti kabassit pay iti ammok maipapan iti daniw...manong, Dios ti agngina iti pammakaritmo...ti Apo ti kankanayon koma a mangbendision kadakayo.

ariel said...

patgek nga abril:
ala, ditay kadi tallikudan daytoy misiontayo iti arte, literatura ken kannawid. sapay ta makapudnoak met iti ar-aramidek. addanto panawen a panagkikita manen. agyamanak iti kararagmo, adingko.
saludannaka ti apo a mannakabalin.
manong A