Agua Pataranta

SPECIAL DELIVERY. Convict Romeo Jalosjos arrives by chartered flight at the Manila Domestic Airport early Friday evening. Behind him is the Super King eight-seater jet that ferried him from Zamboanga City. J. Yuson, Inquirer, Jan 4, 2008

Ditoy ti pakasapulan iti nasanger a basi
ken limdo. Tapno malipatan amin a kayat a malipatan
kas iti angaw ti bukod a lasag a din mamingga.
Kaano daydi naudi a pannakaiwawa ti derrep
nga iti isip ken ramay laeng ti yan ti biag
a saan ket a kadagiti mailukais a rikna?
Anian ta kadagiti rehas a binilang dagiti ranggas
ti kakaisuna nga ayat: ubing, kunak koma,
ngem ta saan daytoy a maikanatad
kadagiti antigo a kebbakebba, iti man
pannakiatag ti puso wenno ti malmalanga.

Nagbilangak kadagiti di makaturog nga aldaw
iti suli dagiti kuadrado a panaglagaw.
Patiem a saan a kas karina ti makiinnala
iti semento wenno lamiis wenno iti pungan
nga uray ungnguem ken madi met agdayyeng
wenno kumayepkep wenno sumubbot iti apuy
nga ipapaidam ti sellang. Bilangek dagiti rabii
nga agkamata: kadagiti sabali a karsel
nga agbirbirok iti inana wenno pannakapnek
wenno aminen nga irurugma. Sumuko ti sumuko
ngem adda alliaw iti nataengan a namnama.

Malagipko ti balasitang a gagem.
Ditoy nga imulak ti nasudi a kananakem
tapno manen itukitko ti bang-ar
iti pus-ong iti sudsod ti rugso nga aggagar.

Bay-am nga agbakwitak manen iti selda
dagiti bilbilangek a panagmaymaysa.
Iti lidok ken tangguapko laengen
a subboten ti kinaul-ulila ti parmata
kadagiti busel a kaniak agrukbab
kadagiti bumeggang a dapan a mapasag.


A Solver Agcaoili
Hon, HI
Jan 3/07

No comments: