Ti Pagilian a Makasapul iti Bannuar

Pimpiman ti pagilian a makasapul iti bannuar.
Bertolt Brecht

Agringkunada dagiti sayangguseng.
Rugi daytoy ti patinayon a saosao
maipapan iti panangitunda
kadagiti mabisin nga umili
iti pannakaisalakan. Iti Pakistan,
mamigatda iti simbolo
agparadusdosda kadagiti laoklaok
a salaysay ti katay ken duggong
dagiti nalaing nga agmanso.
Anansata o ministro wenno asawa
wenno anak, aminen, isuda a putot
ti purgatorio, limbo, nirvana
ken aminen a pakabasolan
iti man aramid wenno panaginsasaan.
Anansata itabon man dagiti maudatal
a kinapimpiman. Gaburan daytoy
dagiti saning-i ti tapok wenno wagayway
sa selyuan iti anug-og dagiti agkudakudaap
a pakasaritaan. Kasla met la tsubibo ti amin:
rikos a rikos dagiti rikna
ngem agbanagto met laeng a ginnantil:
aginnalawatkayo laeng iti poder
kas iti ilik. Ken mabatikami a para sipat
kadagiti inaldaw a seremonia ti kinadaksanggasat.
Uray ta makabuyakami iti ngayed
a pangep-ep iti kiraos ti boksit.
Bay-am ti sanaang iti panunot ta makaulaw
ti agarapaap. Kuna ti asawa ti natay:
Agbibiagkami iti simbolo.
Kunaentay kadi met kenkuana,
depende no ania ti bugas ti dara
nga agsayasay wenno sinno ti umarub-ob
iti nagerretan a tengnged ti pagilian?
Mabatitayo nga agbuybuya iti salamangka
iti bukod nga ili ken ti ili ti nagminatay
kadagiti innayat a kinammalala.
Wenno pannakialimpatok nga agmaymaysa.

A Solver Agcaoili
Hon, HI
Jan 3/07