Kurriti ti Durgi

Kalpasan ti arikenken ket ti kurriti.
Sala a napeklan dagiti aggitebgiteb
a barukong. Agsiota ngata dagiti kallid
tapno manginawda iti isem iti daga?
Ditoy a makiinnala ti saka, danapidip,
danapeg ken beggangan a kumpas idi un-unana.

Kastoy ti sala ti kurriti, ti kakaen a Lucia
ti agkuna. Imuestrana ti karantiway
a saka a naburdaan iti liwliwa
ti sayana ket dagiti sabsabong
ti kayanga, rosal, waig nga agpasaklot
iti gumawgawa a baybay. Parmataem
ti naariwawa a kallaysa, kunana pay,
ti kakaenmi nga itan ket kapidua ti ulaw.

Ngem itay ket ti ritualisado nga arub-obna
iti nasam-it a basi ti balasang, impuslitda
kadagiti karton, aramang, daludal, ipon-La Paz
ken bugguong nga aramang,
nagbiahe dagitoy kadagiti allon ken danag
amangan ta agangot ti uray la nga
ket maipalagip ti ili a naggapuan.

Ibaddekmo a nasayaat, kuna ti kakaen.

Iparagsitmo nga ikumpas iti gitara
ni Ka Eppie, iti kutkutengteng
dagiti agdawat iti pasakalye
ket panagsisinnayaat. Selebrarantayo
dagiti amin a rikna, imurumor
kadagiti bengkag iti panunot tapno
lagipen tapno agruting tapno agbirok
kadagiti init aldaw bagiw tudo nepnep layus
aminen a mamagruk-at iti agragut
a puso tapno iti sumuno nga aldaw
ket ti naisangsangayan a ginggined iti idda
ti panagibilag kadagiti lampin
ti panagbilang kadagiti bote ti gatas
ti panagakay iti ubing nga agallintok.

Kastoy ti kurriti ti durgi, durgi,
yunget ti kakaen, sana ikinni ti patong
a sadiay ket ti espiritu ti arak ti basi.

Ket agsalakami amin iti kurriti ti durgi,
dakami a malmalday a pimmanaw iti ili
tapno manglagipkami a kas iti dati.


A Solver Agcaoili
Hon, Hi
Jan 7/08