Tawen ti Marabutit

Iti daytoy a panawen ti marabutit
ngatngat a ngatngat ti ngipen ni gasat
kadatayo amin a nabati iti ili
kadatayo amin a pimmanaw.

Kadagiti sulsulinek ti panagallaalla
birokentay ti allilaw dagiti puraw a keso
dagiti makaluban a makan
dagiti maregmeg iti sirok ti dulang
kas ken Lazaro wenno dagiti ubbing
kadagiti nawatiwat a lanlansangan
ti bisin ken waw ta ania ngarud
ket nangina ti sangakem a bala
nga imula iti bagi wenno ngiwat ti rebelde
wenno ti pilid ti kanion a mangwakwak iti barukong
dagiti kontra, dagiti di makaida a kapada
ta kas kadagiti kaldero awan met ti masakada
a pannakabsod no di ket didigra
wenno ti riple a no umatipakpak
ket aminen nga ulimek ket inna sultopen
suy-open, sagawisiwan kas iti kuitis
loses bawang superlolo a pangbugiaw kadagiti sairo
kadagiti demontres a gasat nga idi pay un-unana
ket gasaten dagiti dina ammo't agsao.

Iti ili, ti un-unnoy dagiti marabutit.
Agtayyek ti aweng santo agkibaltang
nga agsuek iti maum-uma nga asul a langit.

Adu a pagsayaatan ti mapanunot
ket bay-an a ti marabutit ti agpulkok.
Iti pagsasao a biroken ti birtud,
daytay anting-anting a no sumamay
ket kabaelan a mairusok.


A Solver Agcaoili
Hon, HI
Jan 1/07

No comments: