(Ken Manong Amado Ilar Yoro, pagraeman a mannaniw)
Dagitoy ti pagpupuonan iti panagkalkallautang,
apo a mannaniw dagiti amin a pannakaiyaw-awan:
ti ili idi ubing a birbiroken kadagiti aplaya ni liday
a siririing iti agpatnag, kas iti mapekpek a Waikiki
no dagiti aldaw ket waywayas.
Kadagiti banurbor ti lugan iti freeway,
biroken ti panakpak ti kabalio a maulaw
iti panangguyodna iti kalesa ti ama a pinanawan,
latiko iti ima ken sanantek iti bibig ken bugiaw
iti naglalaok a panagkamkamat iti gasat.
Rigat latta ti adda, uray kadagiti burnay.
Ngem iti panaginnagaw ti sipnget
ken sabali pay a sipnget ket ti seremonia
ti panagungar: tagikukuaen ti buyuboy ti dulang
ket ti ari a basi a nagpara, sumukmom
met iti maminsayud a pannakaisalakan.
Mangted ta mangted iti pammakawan ti mainom
a paraan. Husgaan dagiti aggiinom ti agrikos
a buyuboy nga idi kuan ken nagbalin
a sartin, sa nagbalin a tasa wenno baso
ti panangpasubli iti regta, pia, ken karadkad.
Naannayas a panagsaad ti sanger iti tian
gapu ta ti karubukob ket agpartuat iti kansion
maipapan iti ubing nga umadayo, agpaanud
kadagiti allon ti sebo a maituyag,
maisadsad kadagiti sabali a tagipuro
a kaduana karo't tagainep a sangaprasko.
Sadiay ti tured, wenno buteng kadi
kadagiti di katatawan kadagiti kalkalsada
a pagpampanurnoran?
Bilangen dagiti kursada: iti daya
ket ti Diamond Head a taudan ti linnaaw
iti laud ket dagiti turturod a kabusor ni patay
iti amianan ti mangliwengliweng a baybay
nga agpatingga iti abagatan ti panaglaawlaaw
dagiti artek, isuda a mangikipas iti parek.
Saan a kas karina ti agbiag iti adayo
ti mangbirok kadagiti unas a madapil
tapno makaurnong iti bennal a masamakan
uray laeng sangabutilion tapno addanto
mayatang kadagiti agtawtawataw nga anito.
Ngem uray, apomi a mannaniw,
ibatbatim kadakami ti bitegbiteg ti sentido.
A Solver Agcaoili
Hon, HI
Jan 5/07
No comments:
Post a Comment