Ditoyko nga isurat ti ilak iti amak,
Kuna ti ubing, tallo a tawen a nakem,
Agdua a tawen met a panagbirbirok
Dagiti takiag a nagtalakias,
Mabisin iti karayo ti anak,
Daytay buridek nga agpapuyot iti sugat,
Garumiad ti yaadayo iti adu a bigat,
Rabii a panagpaturog ken panangam-ampog
Iti nakairuaman a "Tu es, tu es sacerdos" a kantak
Ken panagkumpas iti "Duayya ni Ayat"
Iti siririing nga agpatnag.
Makaay-ayo a basaen ti surat,
Dagitay kuraddadeng a kurdit,
Agas ti bannog, ep-ep ti panaas
Dagiti adu pay nga ubbing ken amma
A pumanaw iti asideg ti indayon,
Umadayo tapno agkapuyo dagiti mata
Iti panagbuybuya kadagiti agaddang
Nga inaudi kadagiti nabara a sabangan.
Timuden dagiti amma dagiti garakgak
Manipud iti panagtukma kadagiti ragsak
Ibulsa nga ipapuso, idulin iti lakasa
Dagiti lagip a mabati kadagiti sellang.
Kuna ti baket:
Ay, kaidda ni Nasudi ti kompiuterna a Barbie
Ay, kaidda ni Nasudi ti aramidenna a surat
Ay, kaidda ni Nasudi ti arapaap nga inton
Agsapa nga oras ti panagmulagat ket agdaka
Agsapa nga oras ti panagmulagat ket siririingka
Agsapa nga oras ti panagmulagat ket ubbaem
Amin nga iliw a di naipeksa iti kaawan
Amin nga ila a di naisawang dagiti pimmanaw a kalman
Amin nga umbi a di naisagawisiw dagiti rabii a nalamiis
Amin nga agek a di nayagek dagiti nakaisem a ladawan
Amin a pannakabibi dagiti maiwarsi nga asin ken bagas
Ken balikas a pannakikaasi kadagiti di katataoan:
"Umadayokayo, apo, umadayokayo!
Adawyanyo ni Nasudi, ti nasudi a balasangko!"
Kas iti panangubba amin nga amma a pimmanaw
Kas iti panagakas kadagiti naibilag nga umbi iti aldaw,
Basaek dagiti kuradaddeng a surat ti anak,
Dagitoy agsisilpo nga alibata ti migrante met nga ayat,
"Agawidkan, tatang, yawidmon tay mailiw a salata
Yawidmon tay estoria dagiti nakiginnasanggasat a sapata.
Dagitay man panagilastog dagiti amma
Dagiti ray-a iti ili a napanan, ray-a a di pananglipat
Iti ili a naggapuan. Kas iti sugat ti ubing a masapul
A mapuyutan, kas ti katawami ita a panangilinged
Kadagiti kanito a panagkamat iti nailian a tagainep,
Daytay man din panagpanaw dagiti nagannak iti singed
Daytay man panagsubli dagiti nagannak iti sulinek
Dagiti inaldaw-aldaw a pananglamlamiong iti saibbek
Ti barukong dagiti annak nga agur-uray iti karayo.
Kompiuterakto ti presidente, ibagakto ti riknak,
Ibagakto a siertuenna ti kinalinteg para iti sapasap,
Ibagakton ti panagawid dagiti amin a migrante a gasat,
Agsubli kadagiti tallaong, iti abrasa ti maladaga a bigat."
Pananggibus ti baket:
Ay, ta kaidda ni Nasudi ti kompiuterna a Barbie,
Kunana a suratannanto ti presidente ti ili,
Pasublienna kano dagiti amin a pimmanaw,
Pagawidenna amin nga arapaap a nagtalappuagaw.
Aurelio S. Agcaoili
Torrance, CA
Nob. 24, 2005
4 comments:
manong ariel,
naay, umim-imas latta a kasla burnay a naglaon iti basi daytoy blogspotyo, manong.
iti daytoy a karuay ti masuratyo, di bumurong a dakayo ti most prolific ita a mannaniw nga Ilokano. Sa pay met bin-ig a makalmes iti rikna ken isip dagitoy, anian! tangsit dagitoy ti utek ni Ilokano!
damagmi, manong dita CAL, kunada kano dagidiay dati a colleaguesyo "we want a replacement with the caliber of ariel." maikawada a talaga. ala latta, kaka!
joel
patgen a joel:
agyamanak iti panangipasindayawmo iti numo. uray dagiti obram--saanmo a kunaen a mutual admiration clubta--they do make a lot of sense to our sense of being. about my leaving UP, that was hard, i tell you, so very hard. in so many ways, UP was the haven of my intellectual quest--and irreplaceably so at this time. i miss the exchange, the climate of scholarship, the friendship of many scholars, mentors, students. my, my--why do we have to make sacrifices and difficult choices? ngem kasano ngarud nga agtayyek ti kararua,
bay-an a mapuruto kas ti imuna a ullaw tapno maammuan ti kayat a sawen ti panangalaw iti pakinakem, kinatao, arte, panangngaasi iti bagi ken sabali?
ikagumaanam ngarud ti mangdamili ita nakem, adi, ket kalpasanna, agsubli kadi idiay ilokos ta idiay a damiliem dagiti nakem a makawayawaya.
thanksgiving day me ditoy ita--ken iragpinka kadagiti kararagko.
Manong A
ayaunayen, manong, dagitoy a daniw ken panagdandaniw, aya!
siak kamman koma met!
mangiposteka man met koma, manong, iti ladawan ni Nasudi tapno makitami met ni buridek!
rva
dear roy:
thanks. ngem kasano aya ket retoke met a retoke ni ayi ken camille. isu nga itan, nagadu metten ti pappanan dagiti obrakon. no dadduma, diak metten masursurotan no napnapanandan.
you can try these other blogs: agcaoili-ilocanopoems.blogspot.com; also: agcaoili-filipinopoems.blogspot.com; agcaoili-englishpoems.blogspot.com.
diak pay ammo no ania't sumaruno nga aramidenda. nagrigaten iti ngelngel maipapan iti blog!
regards--ibagakto ni camille a mangipost.
manong A
Post a Comment