Rupakrupak itan.
Awan ngarud la't nasayaat no di aguray
iti bilang dagiti mailibbot iti abut
tapno pagrukopen ti daga
uray dagiti dayyeng iti sellangda.
Agkanalbuong ti pagbabakalan
ta kasta ngarud ti tani dagiti malalaki
dagiti armas. Bala iti bala, kas kunada,
kas pasablog kadagiti maapiki a kanito
a panagur-uray iti awan
iti ginget ti saibbek ken panagpasanaang
tapno kadagiti ulimek ket agputar
ti kakaisuna a mannaniw iti kakaisuna met nga ayat.
Saan a mamingga ti dadaulo
dagiti mannakigubat kadagiti bomba
a ti maysa ket mapakanna
ti sibubukel a pagilian dagiti agkidkiddis
iti rigat, agun-unnoy iti maisakmol
agur-uray iti maipulagid iti dakulap.
Uray man laeng koma binting
nga ar-arak ti ima wenno angot ti sida.
Kas koma ti ittip a tagtagi-urayen
ngem adayonton a panawen no agganab a kasta.
Awan aron ti temtem.
Agkiskissiw ti bukel ti apuy iti dalikan.
Awan kaes-eskan dagiti pagsungrod
a kadendenna ti badang.
Iti sabali nga ili nga adayo
kadagiti kinukusit a sao,
agur-uray dagiti marka demonio,
tay pangpabara iti karabukob
dagiti mabisbisinan a kararuatayo.
A Solver Agcaoili
UH Manoa/Mar 3, 2007
No comments:
Post a Comment