Panagmaro

Umagibas ti agkarkaranting a panawen
kadagiti ganggannaet nga allon
iti Apo Lakay iti amianan a laud
ti Claveria ti ubing a nakem, iti isla ti Fuga
nga ar-arinebneben dagiti gatad
ti puonan, ti balor ti nailian a rang-ay
iti nasantuan a lukong ti ima
nga uringan ti merkader ti pia,
daytay mangisalda iti anges panaguttog
panagkin-od dagiti rabii iti idda pungan
ules tapno mapalaem ti mangiyaw-ayawan.

Ditoy, kas iti pito ribo nga isla
dagiti sangapagilian a sasainnekmi
a maimaro iti karkararag nobena litania triduum
misa prayer rally orasion
panagkurus iti mamitlo iti agmalem,
ditoy nga agarudok dagiti kanito
pumanaw kadagiti lenglengleng

ket iti siudad dagiti silaw a garampang,
sadiay a mapan makisinnukat
kadagiti maimaro a gasat dagiti sibibiag
iti purok dagiti agkamata agmukmukat
agbibineg agkudaap agkissiw
dagiti matalimudaw iti bisin waw kinalinteg
a rumuk-at iti paulo ti pakaasi
iti paripirip ti mannakabalin amin
iti naindagaan a langit
iti nainlangitan a daga
iti impierno a maiserbi

kas iti panagbubutos a masandian
ti nam-ay iti managliplipat a kari
ti kari iti nam-ay
ti tig-ab a tumangad iti barsanga
kalpasan ti pabonar
dagiti nagballigi a balota,
limagasut a pisos, kuni ti boksit,

aganak no dagiti adipen ti linteg
ket ti lintegda ti mangadipen
kadagiti mamirmiraut iti pannakapnek
panagmutittit kas kadagiti hepe
dagiti kubrador ti makiginnasanggasat a taya
iti minalem a panagbariwengweng
dagiti makulogkulog a numero
dagiti albasiador nga agisem-isem
bangbangir no agatang iti ayab ti aklo
wenno iti ipus ti lames dalag paltat
a maitapkal iti diding

saan a kas iti mannaniw
nga agkatangkatang
ti malas a tahor ti sinnukat
a pati signos iti ginnubal
ket imarona iti suerte ti siding

tawaranna piman iti linglingay
uray iti apagkanito apagdeppel apagsayud
a panagassawa ti tamudo iti tamudo
wenno panagsimbalud ti teltel iti tengnged
kas ti panangikut ti sardam iti amian

nga agsalida kadagiti kapanagan

nga am-ammo ti nagkawili a dapan

nagibati iti tugot kadagiti sagawisiw ti angin
a naikali iti sellang ti komersiante a sabangan.

Maro ken maro laeng ti kaibatogan
dagiti daniw ti nagsubli ta nayaw-awan
iti Claveria ti angedan nga ubing
di nanglipat kadagiti misterio
dagiti nagpukaw a mangngalap
ti maidaton a baduya ken linapet
iti lumned-tumpuaw a bato
dagus ti Apo Lakay iti un-unana
agingga iti agdama, iti agnanayon.

Kersang ti kudil iti kersang ti kudil
bara ti lasag iti bara ti lasag
kas iti panaglabus a panangayat iti asul
a danum iti kappia ti baybay
iti panangdawat iti bendision ti Apo Lakay,
mangal-ala iti tartaraudi ti kanibusanan:

bay-an nga agbinnales
dagiti taeng a nagkamanganan:

iti umuna a panawen ti masanguanan
iti maudi a panawen ti patigmaan
kas iti panangimaro iti kinapimpiman
ta awan met gumatang. A, ta iti Claveria
idi ti nagtengnga nga eksena ti tagainep
nga aglaklako iti balangkantis
iti tiendaan inaldaw-aldaw a panagkusit
dagiti dadakkel kadagiti babassit.


A Solver Agcaoili
UH Manoa/Mar 16-07