(Gimbal. Specie de tambor, Carro, 1888)
Iti dangadang laeng a pagringgoren ti gimbal.
Ita a sardam, partuatek ti kanito, sibbarutek
iti sipnget tapno iti maestro dagiti ritmo
ket sadiay nga agtamed, biroken kenkuana
ti duogan a timek kadagiti purok a nilib-aten
ti ariangga dagiti siudad nga yawid
dagiti agtutubo nga agnagan iti lipat.
Dies doliares ti maysa nga aldaw
a panagadal nga agbalin nga imortal
a panagsublisubli iti garaw ti ima ti ama
a pimmusay, isuna a nangisungsong kadatao
tapno sapulen ti panagtitibnok dagiti agsala
a ramay iti lalat ti baka a makaam-ammo
iti asi ti ritual ti kurti ken tingra
ken ti antigo a musika,
pangawis kadagiti anito a pimmanaw
nagtalawataw nagkatangkatang kadagiti estranghero
a duayya iti agkawili a panagpakada.
Kas iti atang iti sarukang
wenno tay kurimaongen idi a lauya
iti karatay wenno ti maikali nga adobo
iti pagbagasan tapno saan nga araken ti taraon
dagiti mannibrong iti ugaw.
Kumpasak ti tugtog ti dangadang
iti agngangabit nga utek, agtanggad
kadagiti pakarikutan iti inaldaw-aldaw
a panangisakad iti nangina nga anges
iti Honolulu nga ili dagiti agmutmutittit
saan a kas panawen iti gawat iti ili
a naggapuan dagiti kari ti aangsan
panawen idi ti panagkurriit ti boksit
kas ti panagsambuambo dagiti pagay
uray dagiti mais, nagpasugnodda a nagsabong
ket iti anginda a nakikamalala.
Maysa nga aldaw, kuna ti ama:
ruk-atantayo iti gimbal ti kasaba
a puon dagiti salakan dagiti amin
nga aldaw iti idda.
A Solver Agcaoili
UH Manoa/Mar 5-07
No comments:
Post a Comment