Panaglangan a Panagdaniw

No naigamer
iti lasag
ti berso
agbibineg
ti rikna
iti agmalem
a panaglangan
iti seremonia
ti sao
ti salamangkana
kas iti babato
wenno ti lana ti pauli
a pangontra
iti mannamay
kadagiti agpipirutong
a milagro
iti minuyungan
dagiti puypuyot
wenno pugpug-aw
wenno pangpang-aw
wenno panangkatay
iti lulunan
tapno masukat
dagiti bambanti
mapatalakias
dagiti an-annong
ti daga
wenno bagi
wenno ti karkarna
ti pimmusay
a metapora
ti kinaasinno.

A, ta agsakit
ti nakem no
kas pagarigan
ta di maarikap
ti kaibatogan
dagiti mayallawat
nga alinaga
maipatawid
iti sentido.
Manglangan met
ti puso nga agayat
kas iti pananglangan
ti ima nga agsurat
wenno ti papel
a mangidiaya
iti saklot
iti tinta a napalangguad.

Aggiteb ti pulso
kas iti panaggiteb
ti nagita a prase
a mangikari iti buniag
wenno sinsinan nga ayat
iti nadakiwas a paspasagid
ti mangsilsilo a bibig.


A Solver Agcaoili
UH Manoa/Mar 12-07

3 comments:

jim agpalo, jr. said...

kalpasan ti panaglangan, papanan ngata dagiti mannaniw, ka ariel?

wen, kasla nailamina dagiti tugot iti dana,ngem kasano ken kaano nga aginana ti mannaniw?

rva said...

iti panaglangan adda latta panagdaniw. daniwantayo ti panaglangan uray aglangantayo nga agdaniw.

ariel said...

shoot, you are both right! ngem makabannog ti babantot nga adda iti isip ni mannaniw, di ngamin?