(Ken Manong JSP Hidalgo, Jr, personal a baglan, kalpasan ti naunday a saritaan a nakautangan manen iti naimbag a nakem, Marso 20, 2007)
Manen a manen a mariknam nga addaka
iti sango ti sibibiag a templo ti kur-itan.
Wenno dagusan met dagiti sagrado
a balikas a di kabaelan nga isawang
dagiti gagangay nga utek a kas kaniak.
Iti panagsaknap ti sipnget iti estranghero
nga unibersidad ti panunot ken lasag
arikapek dagiti maar-arakattot a numero
ti umel a telepono ket iti ungto
dagiti distansia a maagpang,
agtimek ti dadaulo dagiti sirmata
a kadkadua ti panagkatangkatang.
Tagainipem ti panagbalin
a nailian a mannaniw wenno artista, kunana,
adipen dagiti nasam-it a gulib
wenno dagiti gulib a di makaidna.
Apo, kunak, iti boses nga agbesbessag,
saan, apo, saan a siak no di sika,
apo a nangiwanwan kadagiti agtutubo
idi a pakasaritaan, panagbirbirok
iti makan, daniw, ayat, parabur iti pinggan.
Kastakami nga agsao, dakami iti maestro
dagiti ladawan nga adda iti balikas,
isuna kadagiti garraigi dagiti kabalio
iti kambas ti pannakipagayam,
pudno ken natarumamis
nasudi kas kadagiti panawen a di panagkita
dekada a rinangtayan ti sagpapaminsan
laeng a pannakalagip nga agunnoy.
Adu met ngamin ti pakakumikoman
dagiti ramay ken panunot ken isip
iti daga a nakaipalladawan kas kadagiti linabag
ti nobela nga inrugi ngem di met magibusan.
Malagipko ti panawen ti panagad-adal,
dagiti malem a birokek iti sakaanan
dagiti nasudi a kapampanunotan
manipud kadagiti appigud a pangngarig
wenno kadagiti agsisipungtuan
a panagtaltalanggutang kadagiti binatog
ti daniw ti dios a maipinta iti blangko
nga inna pagpintaan kadagiti amin a buteng
wenno ti salakan kadagiti ginnubal
iti maysa a malem iti surong dagiti karayan
iti daya dagiti bambantay a makadokumento
ti rinnupak dagiti agkakadaraan: iti maysa
a pantok ket dagiti mannkigubat iti nadara
a rebolusion dagiti wayawaya a nailako
iti maysa a bangir ket ti mannaniw ti paltog
wenno poder wenno bileg wenno panangikisap
iti semilia ni ayat kadagiti sellang ti agil-ilem a bigat.
Obra maestra nga ikkis met ti kaunggan,
kuna ti mannaniw iti panagtik-a-tik
dagiti kanito iti baetan, sa ti retrato
ti birhen a diak met maaw-awatan.
Ulaw, kunada kadatao,
kuna dagiti di makaawat iti paulo ti uniberso
wenno ti in-inawen ti law-ang iti matris
ti kalman a masakbayan.
Agawaam, kunana, ket mariknak ti kintayeg,
aglulokenak iti pigerger ti langit a maasi
kadagiti obra maestrak a babassit.
A Solver Agcaoili
UH Manoa/Mar 20-07
No comments:
Post a Comment