Naimon a kamalala ti sao,
kerida ti puso
daytay ay-ayaten inggana't
tungpal biag, awan labas
awanan ressat. Enerhia daytoy
ti mangliwengliweng a taaw
manipud iti pantok dagiti masantiguar
a balikas, kas iti babato a makasapul
iti taraon, aldaw-bigat a panangapros
iti barukong ti silalasag a dios
iti ngudo dagiti dakulap, kas pagarigan,
pangpaingar iti rurugsuan
kadagiti amin a pigerger
kadagiti amin a kintayeg ti lubong
tapno aglansad ti pintas iti abut:
iti ugma ket sipnget
iti udina ket sipnget
iti baetna ket ti lawag a napusaksak
mangitunda kadagiti amin a kita ti ranggas
dungngo pannakiinnala iti uniberso nga agmaya
aguttog kadagiti amin a kita ti uttog
tapno manen ti biag agunnoy iti areng-eng
dara panangkamkamat iti anges tapno magteng
dagiti alimpatok ti di managanan a kammaysa.
Partuaten ti pangngarig kadagiti eppes
a pagay iti bengkag, kas tay sairo nga adda
iti abagat ken amian no agsiksikog pay laeng
raep manipud kadagiti linabag.
A Solver Agcaoili
UH Manoa /Marso 15-07
No comments:
Post a Comment