Parada ti Puli

Agaliwegweg ti pakakikian
iti daytoy a parada. Dakami iti baagmi
kas idi un-unana kadagiti panawen
a di pay dimteng ti pannubbot
ti imperialista a dios tapno rukodenna
ti salakan iti ungap ti sellang
barukong panunot ken pagbagasan.
Anian ta awan imbatina iti dulang
no di ket ti makutim a lua
iti nakapakleb a lunglungan
iti banggera nga agkunkuna,
"Allegam, allegam ti mamisok
mangalaw iti segget santo malaokan
iti diro a sandi ti kiraod ti sudo
ti ittip a di man laeng agkersang."
A ta allaalla piman ti bendision
ket ita, iti ili a nakaipalladawan,
agbibinnulig dagiti riknami
dakami nga adda iti Amianan
dakami a di immibbat a puli
di simmuko iti kantaridas ti baro a kari
tapno iti maysa nga oras
a panagkettang dagiti gurong pulso
isem ken addang, iparangarangmi man
iti agturista a rikna
ti riknami, dakami a mangsaksaka
iti maatangan a pakasaritaan.

Saanka nga Igorot, kuna ti maysa kaniak.
Wenno tay saludsod no kasano a nagbalinak
a mangipatpateg iti kinalamolamo
nga ar-aruatan ti abel nga uritan
nalabagga iti nangisit ken dagiti amin a burik
ti kinaasinno iti termino
ti ritmo ti makisasao a gangsa
mapatit tapno aglibbuong aganak iti naimbag a gasat
maisala tapno kaduaennakami ti uddog ti lubong
kas iti sala dagiti billit
wenno ti angin iti Waikiki
ti angin iti lagip kadagiti kabambantayan
ti Cordillera nga agsalog iti sabangan tapno sadiay
aglantip ti bang-ar ti pul-oy
ken ti lamiis ti danum-baybay.

Mabannog ti pulso a manggargari iti gangsa
kas iti pannakauma ti saka nga umaddang.
Alawenmi ti karadkad kadagiti allon
ti sipsipat ket agaddangkami a magna
kas iti pagbabakalan a balligi ti inanama.

Iti damona, naregta dagiti sangi a mangiruar
iti kallid wenno rag-o wenno pakakayawan
kas iti regta dagiti kinuton a dalan
pinunno dagiti agbuya a pasdek
nga agsarua kadagiti mangkodkodak
mangbidbideo mangiteltelebision kannawidan
kadagiti naglabas a sarsarita
a naibalud kadagiti karsel ti dur-as
gera sabong wenno malem a dupudop
ti ayat iti barukong nga aglaplapunosan.

Alaek ti nalabbaga a baag
a naburikan iti panagpannakkel
para iti ina a kadagiti Ibaloi ken Kankanaey
a nagnakem a nakalang-ab iti alisuaso
iti Campo Sioco wenno iti minahan di amana
ket iti nalitnaw a danum ti waig iti ginget
dagiti ubing-ubing a ragragsak
sadiay nga impaanud ti kadkadua
dagiti alingaas. Kas iti ama, masinunuom
ti dara a Yapayao wenno T'neg
kadagiti dumaya nga ar-araraw
wenno tagainep kadagiti rabii ti kalgaw.

Kumpasanmi a salaan iti ritmo
ti tadek wenno salidsid wenno kaniaw
ti palakpak dagiti agbuya a riaw.

Maungpot ti atiddog a Kalakawa
nga agbanbantay iti askaw
kas iti panagguardia ti tuguttugotan
a kadaratan wenno ti bato a mamaglaing
iti didigra ti kanibusanan.


A Solver Agcaoili
Waikiki, Hawaii/Mar 11-07

4 comments:

jim agpalo, jr. said...

uray dagiti sinurat ket makiparadada met.... mayat man a paulo iti sarita wenno nobela.... parada ti puli

ariel said...

apo, kasta a talaga. nabayagen a darepdepko ti agbaag ket ditoy laeng, iti lugar dagiti exilo a pada, ti nakadiskubreak ti ilemlemmengko a laing ti panagkumpas dagiti gurong, with my baag on and swaying to the Waikiki wind, in the full view of people on both side of the Waikiki stretch. Think of ethnic pride, ka Jim! I now know I have it, this pride, ahem-ahem.

roy said...

napintas man koma ti agbaag. kas ken ni kidlat tahimik, mang ariel.

ariel said...

RVA:
wen, kunam sa. datayo a taga-patag ket nagbabaag met isu't gapuna a saan nga umisu ti panangtagtagibassittayo kadagiti taga-Kordi.
isu a manipud ita, ilokanoakon a taga-kordi, ken kordi nga ilokano.